O le po o le Aso Sa na faalauiloa ai e le Peresetene o le Ekalesia Metotisi i Samoa Rev. Aisoli se faaiuga a le ekalesia ua faia i se ulugalii Aele Fou sa fai ma sui o le aulotu i lea afioaga.
O se faaiuga ua faia i le mae‘a ai o se mataupu na ave ai e le tina o lea aiga, ia Amelia Taavaoga Iakopo le faifeau o le matagaluega i le faamasinoga.
O lafoga na faia e le faafeagaiga i lea tina na ave ai se tagi a Amelia, ma o le Aso Faraile na tea nei na faatoese ai le faafeagaiga ma sui o le nuu ma le matagaluega i luma o le Faamasinoga.
Na mae‘a le faamasinoga ua faamauina le moliaga ae ua leai se faasalaga ua faia ma na ta‘ua e lenei tina e matuā tiga lava lafoga na fai atu ma o loo mafatia e oo mai i le taimi lenei ona ua foliga mai ua lē amanaia sona leo, leai se tali e mafai ona avatu, ae ua faalumaluma e faiga o lafoga, “…tapuni lou gutu, o oe o se fafine nofotane, e leai sou fanua, e lē o oe foi o se tagata uli…”
E pei lava ona silafia o Aele Fou o se nofoaga ua faamautu ai i latou o suli o tagatānuu Solomona na aumai i tausaga ua tuanai e galulue i togakoko a le Malo lea la e iai nofoaga e pei o Aele Fou faapea ai ma Sogi lea ua toatele ua see i Falelauniu.
O Amelia o se sui o le Komiti o le Aoga a Aele Fou ma na ia faaalia ua agai nisi o le komiti ua ave se faitioga i le nuu lea e taitaifono ai i le fono faapitoa lea le faafeagaiga o le latou matagaluega ia Rev. Vine Apulu. O le faaiuga la lea a le nuu e aveese ona tofi o le sui o le komiti o le afioaga.
O le mataupu lenei na ta‘ua na tootuli lelei le faafeagaiga i luma o le Faamasinoga atoa ai ma sui o le afioaga ma e mautinoa le tiga pea o le faafeagaiga ona o le tulai mai o lenei mataupu e pei ona laga ai i le fono o le Aso Sa o le faanoanoaga lea o le Ekalesia ona ua agai le tina ia Amelia ma ave le mataupu i le Malo e ala i le faamasinoga ae ua lē agai atu i le Ekalesia e talanoaina le tulai mai ai o lenei faafitauli. E lē gata i lea ua manatu le ekalesia o se mataupu o le lotoifale lava ia o le Ekalesia ma ua lē talafeagai le iloa fua e le toatele o le atunuu o nei mataupu.
Peitai ua ta‘ua e le toalua o lenei tina, le tamā ia Taavaoga Iakopo ua manatu foi a lē malu ai i le ekalesia ona pau lava lea o le isi auala e lagona ai se leo o le ave o le mataupu i le Malo.
Faaalia e le tamā o le aiga, o ia e lei iai lava sona fesootaiga ma le mataupu lenei i le va o lona toalua ma le faafeagaiga aemaise i le aveese ai o tofi faasui o le komiti o le aoga a lona toalua, ma o lafoga foi na ave e lona toalua i le faamasinoga ua manatu Taavaoga o le aiā tatau lava lea a lona toalua, peitai ane ua te‘i i le aveese atu ai foi ma ona tofi o le Failautusi a le Matagaluega a o taumafai ai o ia e talanoa i lona toalua e aveese le tagi ae soalaupule le mataupu i tua.
O le mafuaaga lea na ta‘ua e le tamā na tuu ai loa e faaauau le mataupu ona o lea ua te‘i ua aveese ai ma ona tofi ae e lē o ia lea e feeseeseai ma le faafeagaiga o lona toalua.
O le faaiuga la ua aumai na ta‘ua e Taavaoga na te talia le faaiuga ua aumai ae o ia o se sui ua leva ona tautua ma e manao e tautua saoloto i le galuega a le Atua e ala i le ekalesia.
O ia o se sui o le Ekalesia ua leva foi ona tautua malosi ona mātua i totonu o le Matagaluega ae o le manaoga o iai nei o le a talanoa i le Peresetene lea ua faia le faaiuga o i laua, ina ia o ese ma fanua o le ekalesia o loo nonofo lisi ai lo latou aiga.
