Afai ae afea se aiga e le maliu ma le oti, e lē o se aso faigofie i le soifuaga nei, ae faafetai auā ua mausali la tatou tapenaga i le nofoaga moni ua uma ona saunia e lo tatou Matai. O le tina ia Fia Laumata Savea Autufuga na maliu i le aso 17 o Oketopa 2011 ina ua ia pasia le 74 o ona tausaga (10 Oketopa 1937). Na molimau le fanau i toe sekone o le soifua o le tina ia Fia i le maota gasegase, sa ia saunoa faalototele ai, “Aua tou te faanoanoa o lea o le a ou malaga ma te feiloai ma lo‘u Matai”, ma ua avea lea ma faamāmā avega i loto o le fanau ua tuua mālie atu e si o latou tina le latou mafutaga i le tino nei.
O le afiafi o le Aso Sa, 23 Oketopa na faia ai sauniga faaleaiga o le tina, ae o le Aso Gafua na sosoo ai, 24 Oketopa, na faia ai ona sauniga faamavae. O le susuga i le faafegaiga, Ps Ieremia Sami na taitaia le sauniga faatasi ma nisi faafeagaiga sa soosoo tau‘au. O le faafeagaiga ia Ps Manuula Nai na fofogaina se molimau o le tina ia Fia, faatasi ma se upu faamafanafana auā le fanau e ala i le Tusi Paia. O Ps Manuula o le auauna a le Atua sa faafaileleina le soifua faaleagaga o le tina, ma o i laua ma le faletua ia Foloi Nai, o loo avea nei ma faafeagaiga a le ekalesia Faapotopotoga a le Atua (AOG) i le pitonuu o Kingston i Brisbane.
O le tofa ia Lei‘a sa fai ma fofoga o aiganalua e faafetaia le Ekalesia aemaise le mamalu sa auai i toe sauniga o le tina, ao le fofoga o le ekalesia i Kingston, le susuga ia Lami Pisa sa tu i le tootoo auā le agatonuina o aiganalua. E toasefulu alo o le tina ia Fia, o le toatele lava o i latou o loo aumau i Brisbane Ausetalia, a o nisi o loo i Niu Sila, ma sa malaga mamao mai lava i Brisbane ona o le molimauina o toe sauniga o si o latou tuaa.
Molimauina le maualuga o faaaloalo a le fanau faapea aiga, sa aao i ai e ala i auauna a le Atua, faapea le Ekalesia sa galue ai si o latou tina a o soifua mai, tainane foi Samoa sa potopoto i lea aso.
O le tina ia Laumata Fia Savea Autufuga, e mai i le alalafaga o Pue ma Saleaumua i Aleipata.
O toe upu a se tasi o alo o le tina ia Fia, le susuga ia Tulafono e faapea, “Talofa e, ua lē toe iai se tina sa tausi ma fai ma fiafiaga ia i matou ae o lea ua malaga”. O le mafuaaga o ia upu ona faapea le molimau, o ia lava sa faamautu i ai le tina ia Fia, ina ua taunuu mai i Ausetalia. Amuia e oti, o i le Alii!
