Oo i le tulafono tuua‘iga o le sefuluafe na gaoia – Fetuu e le faifeau le sui o le aulotu
O tuua‘iga faasaga i le tofa Pagamalie Penani Lemuelu ma lona faletua o Tusi sa avea ma teutupe o le EFKS a Aleisa i Sasae ona o le sefuluafe tupe Ausetalia o se vaega o le latou seleni na maua i le sailiga tupe na leiloa, ua oo i le faamasinoga.
O le tagi na faaulu e le tofa Pagamalie Penani, o lona faletua sa avea ma teutupe a le aulotu lea sa faamaopoopoina seleni ma nisi o sui o le aumalaga faapea nisi sa talimalo i le malaga o le suegatupe na alu i Ausetalia a le aulotu i le masina o Setema o le tausaga nei.
O le mafuaaga lea o tuua‘iga na faia e le faafeagaiga le susuga Apisaloma Ta‘eleipu ina ua foi mai i Samoa le malaga ae faamavae ai ma le tofa Pagamalie ma lona faletua e lē toe lolotu ona ua lagomia lagona i tuua‘iga ua faatūtū ia te ia ma lona faletua.
I faamaumauga a leoleo o loo faaalia, o Oketopa na lafo ai e le faifeau ni upu faalumaluma i lē ua tagi ma lona faletua i se feiloaiga na faia i le maota o Pagamalie ma lona faletua i Talimatau. “Lua mea gaoi, ‘ai gaoi. Ke iloa o a‘u o le faifeau, e ke vaai i ai o lou ma‘i lava lega e ke oki ai”.
O upu faalumaluma ia na lafo e le faafeagaiga e pei ona faamauina i le moliaga a leoleo lea sa valaau i le faamasinoga fesoasoani poo le FF i Mulinuu i le Aso Lulu 4 o Tesema 2013. E lei oo atu lē ua molia ae o lana loia le afioga Leuluaialii Tasi Malifa sa tulai ma faailoa i le faamasinoga le pepa ma‘i poo le medical certificate o le faifeau le mafuaaga o le lē auai.
Na talia ai e le faamasinoga le talosaga a le alii loia e toe tolo le mataupu i le tausaga fou, ma sa lagolagoina foi e le itu a leoleo ona o le masina o Ianuari 2014 e faatoa taliu mai ai i Samoa se tasi o a latou molimau.
O Fepuari 2014 i le aso 26 ua toe faatulaga e valaau ai le moliaga e tasi o le faifeau o le lafo o ni upu faalumaluma. Peitai e iai le talitonuga e tusa o se molimau faatuatuaina na oo mai, e iai le isi tapenaga a lē ua tagi e toe faaulu ai se isi ana talosaga i le faamasinoga i le faaleagaina o lona tagata faatasi ma lona faletua ona o le tuua‘ia o laua i le sefuluafe na leiloa.
Saili se laveai o le mataupu
A o lumanai le aso 4 o Tesema na valaau ai le tagi a Pagamalie ma lona faletua i le faamasinoga, o le aso taeaopo o le Aso Sa le aso muamua o Tesema 2013 na faaalia e lona faletua na faateia ai i le oo atu o se savali a nisi o le aumautofi o le aulotu faatasi ai ma le faafeagaiga.
Na faaamatala le faletua o le autū o le oo atu e pei ona folasia e se tasi o le aulotu le mafuaaga o le savali, o le fia talosagaina o lona toalua e tusa o le mataupu ua i luma o le faamasinoga.
Peitai na tali i ai le faletua o lona toalua o loo malaga i fafo na o ia e maua ai se tala e tusa o le latou oo atu.
