Ta’iala le Ekalesia a Colyton Samoan AOG i le Faafealofaniina o Tupulaga Talavou o Samoa
O le Aso Sa 29 o Aperila na faatumulia ai le malumalu o le Ekalesia Samoa AOG a Colyton, i mātua ma aiga, aemaise o le paia o le ekalesia ma le susuga i le Faafeagaiga ia Pastor Leaegalesolo Fuiavailili Fialelei ma le faletua ia Rasela, aemaise ai o le silia i le selau le tupulaga talavou, ona o le faatasiga a tupulaga talavou sa faafoeina lea e le susuga i le faafeagaiga ma le ekalesia.
I se molimau ola lava o lea aso, na ta’ua ai e se tasi o tupulaga talavou mai le Ekalesia Katoliko, e faapea, “E ese le tāua o lenei mafutaga, ona ua mafai ai e latou o tupulaga talavou Katoliko ona maua se avanoa e mafuta ai ma faamasani ma nai o latou uso talavou mai isi ekalesia”.
Ina ua maua le avanoa o le Samoa Times e fesiligia ai ma faatalanoaina ai le susuga i le Faafeagaiga ia Pastor Leaegalesolo Fuiavailili Fialelei, i le auga ma le faamoemoe na mafua ai lenei mafutaga o tupulaga talavou a si o tatou atunuu, na ia saunoa ai e faapea, “O se vaega o lana misiona faafaifeau sa tulimata’i pea i ai lana vaai mamao, ona o le tele o tupulaga talavou o loo pa’u atu pea lo latou olaga talavou i le mau faaosoosoga o lo latou olaga talavou. O le ala lea na una’ia ai pea lona lagona i se polokalama e mafuta faatasi ai tupulaga talavou ma fefaasoaa’i a latou taleni ma lagona”. O le saunoaga lea a le susuga i le alii faifeau.
Ona o le sologa lelei ma le fiafia o tupulaga o le atunuu i le polokalama ma le sootagata lelei ua maua e tupulaga mai lenei fuafuaga, lea ua manatu ai le faafeagaiga ia Pastor Leaegalesolo ma nisi o faifeau, i le tatau lea ona saga faaauauina lenei polokalama mo aso oi luma.
E momoli ai le faamalo ma le faafetai tele i le susuga i le faafeagaiga ia Pastor Leaegalesolo ma le Faletua ma le Ekalesia, ona o lenei polokalama tāua aua le alofa i tupulaga talavou o le atunuu o loo lalovaoa lo latou ola i atunuu ese.
Ia saga faamanuia le Atua ia outou auaunaga mo le Atua ma lona finagalo.
