O le masina lenei o Novema ua faatāua e Malo Aufaatasi e tetee atu ai i soo se ituaiga o sauaga faasaga i tina ma tamaitai ma fanau o le lalolagi e pei ona aofia ai foi ma Samoa. Ua ta‘ua lea faailoa o aso e 16 o gaioiga ma polokalame e tetee atu ai i sauaga.
I Samoa ua lua tausaga talu ona latou faatāua lenei faamoemoe tāua, ae o le tausaga nei ua agai polokalame o le 16 o le tetee i sauaga i faalauiloa ua autu i nisi o solitulafono tau sauaga matuia ua aafia ai le soifua o nisi o fanau ma tina ma tamaitai e pei o le tina talavou o Fatima Tupai o Leauvaa.
E ogaoga tele manu‘a o le tina ia Fatima na faaoo i ai e lona toalua o Toni, lea ua molia e leoleo i le fasioti tagata faamoemoeina. O toe sauniga o le tina na faia i le Aso Tofi ua mavae lea sa molimau ai le tina o Lucy Tupai i le faigata o le mafutaga ma le afafine, o le uii o lana fanau e toa sefulutolu ua motusia ona o le oti e mafua mai i sauaga.
Sa ia molimau ma ave lana luitau i isi aiga o le atunuu ina ia taofia nei loa sauaga auā e lē o se gaioiga e fiafia i ai le Atua.
Na tutulu le tina o Lucy ma ia faailoa i le aofia na auai i toe sauniga o lona alo tamaitai o se mea matautia lea ua tupu ia te ia talu ona soifua mai o le momotu o le mafutaga faamatua ma se tasi o le fanau e sili ona pele aemaise o lona afafine ua maliu o se tagata e loto alofa ma tausi lelei ia te ia.
E pei ona silasila ma faitau i se tasi o a tatou lipoti i le lomiga a le Samoa Times o le vaiaso ua mavae, o loo faamatala atu ai le mea na tupu i le tina o Fatima ma le la mafutaga ma lona toalua le tamaloa o Toni o se taulealea mai Foailuga i Savaii ae sa faamautu i se aiga e masani ai i le nuu o Satapuala.
Na mafuta ma le tina o Fatima a o nofo ai i se aiga o le nuu o Leauvaa. E toalua le la fanau teine o le ulumatua e 3 tausaga ma le pepe faatoa 16 masina. Ua tausia nei le fanau e le aiga o le tina o Fatima i Leauvaa uta.
O le faatāua o le maliu o le tina e le faalapotopotoga o le Toomaga mo ē Puapuagatia e faalauiloa ai lana mau o le solipala o soo se ituaiga o sauaga i totonu o aiga, na tu‘i fu‘a samasama ai le alatele agai atu i le fale o le aiga o Fatima, ma sa tauave ai foi e nisi o tamā o sui o le Toomaga i totonu o Leauvaa se fu‘a ua tusia ai faaupuga o le tetee atu i sauaga.
O se gaioiga sili ona tāua auā na silasila i ai le toatele na auai i toe sauniga o Fatima ma faatupu manatu ai i le tāua o le maua e le tina ma le tamā o se olaga fealofani ma fiafia auā o le a sologa lelei ai mea uma i totonu o se aiga ae sili ona faatupuina ai le fiafia ma le fanau.
Na maua le avanoa e fesiligia ai le Pelesetene o le Toomaga le afioga Muliagatele Siliniu Lina Chang i le galuega o loo latou faia o le faalauiloa atu o le tetee i sauaga. O le saunoaga mai a le pelesetene e poo le ā lava le tele o luitau o loo feagai ma le Toomaga i le taumafai e ave le fagufagu i le atunuu, ae lē tuua le tiute o le faalapotopotoga.
O le itu sili foi ona tāua i le latou faalauiloa ua toatele nuu ua auai ma ua faigofie tele ai ona ofi le latou tala‘iga.
