O le tausaga pito tāua lenei i le paeaiga a le Palemene o loo iai nei, ona ua lalata le vaivaa ma ua faitau masina ona faata‘ape lea o le fono aoao faitulafono ae agai le atunuu i ona itumalo faafaipule e toe filifili mai ni sui o o latou itumalo mo upufai o Samoa.
O lea ua soalaupule nei e le Palemene le tala autu mulimuli o le tupe mo lenei paeaiga faapalemene ma le faigamalo o loo tu nei i le foe, ma o se avanoa faaauro foi lea mo sui mamalu uma o le Palemene e saunoa ai ia latou lauga faalauaitele mo ni mataupu o loo lagona e le sui e tatau ona fofola atu i le faigamalo e faia i ai ni fuafuaga ma ni faaiuga.
O le tele lava o saunoaga e agai i atinae eseese e fia faaleleia i o latou itumalo aemaise lava o atinae e manuia ai tagata. O le toe tauaofia o le fono aoao i le Aso Tofi 18 o Iuni 2015, sa faapea o le a taufao avanoa mo ni saunoaga faalauaitele peitai sa tauanau gata sui mamalu.
Na pau le itu na tau siisii ai finagalo o itu e lua o le maota, ona o ni vaega o le tala o le tupe autu ua lē atoatoa i le silasila a sui faipule o le Itu agai, ma na tuua‘ia ai le faatamala o le Malo i le tapenaina o le tala o le tupe.
O le faatalanoaga masani a le Palemia o ia foi o le Minisita o Tupe i le leitio o le 2AP lea e auai ma nisi o tusitala, na faaalia ai e le taitai o le Malo e tupu soo lava ni faaletonu faapea. O nisi o faaletonu e mafua mai i le sese i le taimi e ta ai i masini lomitusi, ae o nisi foi taimi e sese mai i le tuufaatasiga o lautusi o le tala o le tupe.
“E lē o se taimi muamua lea ua tupu ai sea faaletonu, ae o le mea lea sa matauina o le tauanau gata o sui e lauga ae o aga masani lava ia a le maota, e faatalitali poo ai sui o le a amatamea ona maua ai lea o ni manatu o isi sui e fatu ai a latou saunoaga”.
O le finagalo lea o le Palemia susuga Tuilaepa Lupesoliai Sailele Malielegaoi, ina ua fesiligia. O le vaiaso nei o loo faaauau ai fonotaga a le Palemene mo le soalaupuleina o le tala autu o le Tupe mo le tausaga faaletupe 2015 i le 2016.
Ua faaalia e se tasi o faipule o le maota o se vaiaso o fonotaga o le a faalogoina ai ni saunoaga malolosi auā o le a faapalalasi ai ma pomu atomika a faipule faasaga i ni atinae o le a uma le paeaiga e lei faia, poo le toe susue i luga o ni faaletonu sa aliali muamua.
O le a faafofoga ai foi le atunuu i ni feupuaiga ma taunuu ai i ni lafoga tau faifai poo le toe lalaga mai o ni faaletonu faasaga i se sui. “O pomu uma lava na o le a felelei solo, ae tasi lava le autu o faatosina o le palota”.
O le nofo aitalafu o le atunuu i faalapotopotoga tetele i fafo ma faletupe faavaomalo o nisi ia o vaega o le a samala i saunoaga o le tala o le tupe. O fuafuaga foi a le Malo ua faataoto i le tala autu aemaise o le siitia o nisi o lafoga o isi ia mataupu.
