Ole aso malolo ole Leipa ile Aso Gafua talu ai na faatino ai ele Fono Aoao a Tagata Samoa i Sini se polokalame mataina na faaigoaina ole Samoana Sports Day e aumai faatasi ai le atunuu i lenei vaitau lagi lelei male mafanafana, mole faatinoina mo nai taaloga e pei ole netipolo, volipolo i luga ole vao faapea le faaulufaleina mai ole taaloga fou le OZ Tag.
E moni sa faia taaloga i vaega eseese i tausaga talu ai ae ole taimi muamua lenei ua faaaogāina ai le malae tele i Liverpool o Woodward Park lea e fetaula‘i solo ai magaala o Sini ma lata i o tatou tagata.
Ole faatinoina o Faafiafiaga a ausiva ma atunuu e pei o Toga, faleaiga eseese, laei, ma taaloga na vaaia ai le lolofi atu ole atunuu e maimoaina.
Ose vaaiga uigaese le feafioai solo ole atunuu mai lea taaloga ma lea taaloga e maimoa ae ole malae autu na iai le faleie tele sa afifio ma maimoa atu ai le atunuu i faafiafiaga mai luga ole stage.
O tafatafa lava sa toe vaaia ai le volipolo a alii sa faia i luga ole mutia ma ua pei e toe vaaia ai voli i lalo o laau i Samoa. E matagofie foi Ipu tetele ma Tinoitupe sa manumalo ai ‘au taaalo, aepeitai, ole sini ole Fono ia maopoopo le tupulaga ma fealofani ma lē vaaia ai se gase pe vevesi na ole fiafia male fealofani.
Na faaopoopo iai male matagofie o suigi ma masini tetele taavilivili mo tietiega ma faafiafiaga ale fanau. I faafiafiaga na vaaia ai foi se ausiva matagofie mai Toga le Lupeeko aemaise le Tausala Samoa Niu Sa Uelese ia Tayla Scanlan.
Na taualuga lava taaloga ile Sailiga Siamupini ale OZ Tag lea sa manumalo ai le Mc Oztag FTA kapeteni ai le alii o Ozzy Scanlan Tupai ma o latou maua le seleni $200 faapea le Ipu autu na lagolagoina ele tamaitai ia Leute Higgins mai le Central Coast Youth Centre aemaise pine tauoloa, mitiafu ma taumafa tuupepa auā sui taaalo.
O isi kamupani lagolago e aofia ai le SCU Banking lea sa faatasi atu foi la latou pule ia Freddy Sooalo. Ole susuga Rev Iakopo Leleimalefaga na tatalaina le aso ise tatalo faamanuia ae tauaaoina e Rev Faauuga Siitia male afioga Gisa Vili Alaalatoa faailoga o taaloga eseese.
Faaalia le agaga fiafia o i laua ile matagofie ole polokalame, ma ua toe sauni mai auā le tausaga fou lea ua mausali ai lenei aso, le Samoana Sports Day ile kalena ale Fono Aoao.
