Mafutaga ale alalafaga o Gataivai i Brisbane

Mafutaga ale alalafaga o Gataivai i Brisbane

Ua talisapaia ma talileleia e le mafutaga a Gataivai i Kuiniselani se tusi mai Samoa ile susuga ile tama faifeau ole ekalesia e tasi ile alalafaga o Gataivai, ole paia lava lea i le afifio ole Aiga Salevalasi, Tiatia ole ituala mavae, Togiai ma Faalaa, le Falevalu ma le Foiala, aemaise le mamalu ia Salemuliaga.

Ole taunuu mai o lenei tusi ma lauina e nisi o tamalii ma failauga ole nuu, na ae ai se finagalo e talo se fono ile paia ole alalafaga o taape i Kuiniselani, lea na afifio ma tala atu ai aao ose vaega ae faaailoa loa le mafuaaga ole tusi. Ole masina o Ianuari ole tausaga nei na amataina ai loa le mafutaga ma ua atoa le 13 o matafale. O faaiuga o masina uma e faia ai fonotagata ma talanoaina ai mataupu aemaise nai saoga seleni e faasauni ai ma tapena mo le faamoemoe pei ona atofaina.

Ua tasi moemoe le Tofa i aiga Salevalasi ma Tiatia aemaise le faautautaga ia Togiai ma le Faalaa, ma le mamalu ole ekalesia i le Tama Faaleagaga ole faaiuga ole tausaga nei 2018, ole a susunuina ai pepa ole ole aitalafu ole Hall lea na umusaina i le 2012, ole mafuaaga lena o lenei faamoemoe ma oloo ua galulue uma iai alo ma tamafanau ole Afioaga, i soo se tafa ole kelope o afifio ma nopiai ai.

Ua iai foi le faamoemoe ua avea lenei fuafuaga ma auala ole a malaga ai nisi ona ole fia lagolagosua lava ma fia auai i lea faamoemoe faapitoa.

O nisi o toa e le gata o nai tuaa sinasina, tamalii ma failauga, paolo ma gafa faapea alo ma tama fanau ole alalafaga na lototasi uma finagalo, ua talafeagai le tali aloaia ole faatalauula mai Samoa. Ose tasi lenei o alalafaga e na’o le tasi lava le ekalesia e iai ile nuu, e ui ile toatele o alo ma tamaddfanau ua sui tapuaiga, ae le mafai lava ona mavae le alofa moni e susue lava le faamalama ma tepa i le nuu na soifua ae ai. O ao sinasina ma e tino matutua ole mafutaga ole Afioga ia Mapuilesua Saufoi, Sao Tamaitai, faapea le Afioga Samalaulu Faaifo, Tiatia Laumata, Tiatia Ualesi, Lema Simone ma Litia Toilolo.

E talo atu ai le mafutaga a Kuiniselani i soo se tafa o lenei aai o aumau ai nisi mai le alalafaga o Gataivai i Savaii, e valaau atu ma le agaga faaaloalo tele le tatou mafutaga, finagalo malilie e afifio mai tatou pulupululima faatasi ile tatou faamoemoe, o so tatou sao foi lea aua si o tatou ekalesia Metotisi i Gataivai i Savaii, ole nuu e loto tasi ma fai meamafai.

Oloo avanoa le laulau e fesootai mai iai i soo se taimi lava.

LAULAU ole FONO:

Peresetene – Tiatia Ropeti Amituanai

Sui Taitai – Lema Fineaso

Failautusi – Lucy Fagamalo

Teutupe – Faaifo Mapuilesua Tufuga