Tusia: Tiatia Failautusi Tiatia
Aukilani
Na leai se nofoa na avanoa i totonu o le hall a le Richmond Bowling Club i Mt Wellington i le Aso Sa ua mavae 6 Iulai, i aiga ma uo aemaise o ekalesia e tolu na auai e molimau le faavaeina ma le osiga feagaiga a le faafeagaiga ia Gafatasi Lilomaiava ma le faletua ia Leaia Lilomaiava ma le la ekalesia i Mt Wellington.
O loimata o le fiafia na vaaia i lea taeao ina ua tau lau o le faamoemoe na moemiti i ai le susuga i le faafeagaiga ma le faletua faapea le ekalesia. E tolu aulotu o le pulega a le Samoan Universal Church sa auai.
O le matagaluega i Magele, o Manurewa ma Otara, sa faapea foi ona faatasi mai ai ma le taitai o le ekalesia o le Independence Assembly of God le susuga ia Mui Fruean o loo tausia le aulotu i Kelesetone, aemaise o auaiga o le susuga i le faafeagaiga ma lona faletua na malaga mai Samoa.
O le taitai o le sauniga o le susuga i le faafeagaiga ia Gafatasi Lilomaiava, ma o ia foi sa faatulima e faafeiloai i le paia o le aufaigaluega a le Atua aemaise o le mamalu o le auvalaaulia.
O le sauniga o le osiga feagaiga ma le faavaeina o le lotu sa nafa lea ma le taitai aoao o le ekalesia i Niu Sila, le susuga i le faafeagaiga ia Tafua Maseafa Pua Ah Wong.
Na faamumū uma moliga‘o a le susuga i le faafeagaiga ia Gafatasi ma lana lafu mamoe ae tatalo i ai i luga faafeagaiga sa auai. O le faailoga o moliga‘o, o le ata vaaia lea o le galuega a le Atua o loo tupu ma ola pea i totonu o Niu Sila faapea isi atunuu o le lalolagi.
Na sosoo ma le folafolaina o le upu a le Atua e le susuga i le faievagelia ia Uu Vailagilala o loo tausia le matagaluega i Otara. O le manatu na autu i ai le lauga a le faafeagaiga, “Lou ananafi na te avea oe ma lou aiga i le manuia mo a taeao.”
O se mau na oo i loto ma finagalo o le aufaalogologo, ma suia ai le loto o se tasi o tina na auai, ma ia faia ai se filifiliga tonu e talia le faaolataga a Iesu i lona soifua. O le susuga i le toeaina o le pulega ia Pelenato Taupau na osia le taulaga o le faamanatuga e pei ona masani ai Aso Sa muamua o masina taitasi. Sa faapea foi ona faatinoina aitema mai autalavou i ekalesia sa auai.
O le taualuga o lenei faamoemoe na faia ai loa ma le taumafataga tele i totonu o le hall na tapenaina lava e le akalesia o le Samoan Christian Universal Church i Mt Wellington. Sa faapea foi ona fai ai ma faaaloaloga, o le oo a le susuga i le faafeagaiga ia Gafatasi ma le faletua, ma le la ekalesia i totonu o le pulega i Niu Sila nei.
O le tofa ia Lemaota Siualii sa fai ma sui o aiganalua e tu tootoo i le taimi o faaaloaloga. Ma ua avea ai nei le ekalesia i Mt Wellington ma se tasi o aulotu e fā i ai matagaluega o le Pulega i Niu Sila a le Samoan Christian Universal Church.
