Faavae le aiga fou o Tito ma Winnie Niue

Ole pele o fanau i mātua na vaaia ai foliga fiafia o aiganalua e ala i tapenaga na molimauina ele mamalu ole auvalaaulia, faapea uo ma ē masani aemaise o susuga i faafeagaiga ma o latou faletua sa auai e fai i latou ma molimau ola ile osigafeagaiga ale alii o Tito Niue faapea lana manamea ia Winnie Mariner.

Ole sauniga ile taeao ole Aso Toonai ua mavae, 24 o Setema na avea ai le susuga ile taitai ia Seugalii Uu Sulifau Vailagilala mai le Ekalesia ole Samoa Christian Universal Church ma taitai ole sauniga, ile malumalu ole Ekalesia Samoan Christian Revival i Otara.

Ose sauniga mamalu male faauuina a‘o pepese ma vivii tagata e siitia le viiga ole Atua ina ua mafai ona faataunuuina male fiafia le aso faapitoa ole fanau.

Ile taimi na tautalagia ai le afioga ale Atua ele susuga ile faafeagaiga ia Alofagia Elinofoa mai le Ekalesia Nasareta ole tasi lea taimi tāua ile ulugalii fou aemaise ole auvalaaulia sa auai, ina ua saunoa le faafeagaiga ile tāua ole Alofa i totonu ole aiga poo le ulugalii.

Ole tumau ile faatuatua male faamoemoe male alofa ole sili o na mea e tolu ole Alofa. Ma ose upu e lima ona mataitusi ae sa toe faamaati ai le faamautu ole faavae ole aiga ia Iesu Keriso.

Poo le ā foi le tele o mea e maua ile olaga ae a leai se alofa e lautua ai e faatusaina lea ise apamemea taalili poo se sumepalo tagitagi. O feofoofoaiga i loimata ole fiafia i mātua faapea aiga male ulugalii fou ina ua suia lagona ole alii o Tito male tamaitai ia Winnie ile isi laasaga fou ole olaga ua iai ina ua mae‘a le sauniga.

Na toe faaauau le mafutaga ale ulugalii fou male auvalaaulia ma aiganalua ile hall ale Manihiki i Otara ile taumafataga tele na saunia ele faleaiga ole Continental. Ole susuga ia Maea sa fai ma fofoga ole aso ae ole tofa ia Laupa Tusa sa tu tootoo i taimi o faaaloaloga.

O molimau a mātua ile olaga ale fanau sa fai lea ma talalelei i o laua olaga i totonu o aiga ma ekalesia a‘o avea ma tama ma teine talavou. Ole susuga ia Tito Niue ole alo ole susuga ile faafeagaiga ia Gotoilefatu Luteru Niue ma le faletua ia Ila Niue, ae ole tamaitai ia Winnie Mariner ose alo e faasino ile susuga ia Tiumalu Mariner male tina ia Afetala. Ia manuia le aiga fou!