Faavae fou mo Samoa i Aukilani

Afioga i le Konesula, Faolotoi Reupena Pogi ma le Maota fou o Samoa i Magele
Afioga i le Konesula, Faolotoi Reupena Pogi ma le Maota fou o Samoa i Magele

E le toe faia ni sisigafua i le Queen’s Birthday

Ina ua mānava le toa alii ua mapu foi i fale o matu le faamoemoe sa feagai ma le atunuu o loo aumau i Aukilani nei, o le faamanatuina lea o le Sisigafu‘a 2016, lea sa galulue faatasi ai le Fono Faufautua a Samoa, o le Fono a Faifeau faapea le afioga ile Konesula o Samoa i Aukilani.

Na mafai ona maua se avanoa o le afioga ile Konesula ia Faolotoi Reupena Pogi e talanoa mai ai ile tatou nusipepa e tusa ai o nisi o mataupu sa laga i tusitusiga i nai vaiaso ua tuanai atu. E lei toe ‘alo le afioga ile Konesula i lona finagalo tuusa‘o, o ia o le Sui o le Malo Tutoatasi o Samoa, e tusa ai o le agai i luma o le faamanatuina o le Tutoatasi i totonu o Aukilani.

Na saunoa manino Faolotoi, o le agai i luma e tasi lava le nofoaga o le a tapuvaetasi i ai Sisigafu‘a a Samoa i Aukilani, o le Maota o Samoa i Magele.

E pei ona silafia e le atunuu, ua lē o toe mamao ona tatala lea o le Maota fou o Samoa i Magele o le a faapea foi ona sifi le ofisa o le Konesula ma lona ofisa mai le Maota Samoa i Karangahape Road, i le Maota fou o Samoa i Magele.

O le nofoaga tonu lea ua saunoa manino i ai le Konesula, o le a faatino ai Sisigafu‘a a Samoa i Aukilani e lē toe faia i se isi lava nofoaga.

Na faapea foi ona faailoa manino e le afioga ile Konesula, o le Konesula ma lona ofisa e taiulu ile Sisigafu‘a. E lē gata la i lea, ae ua faapea foi ona faama‘oti mai e le afioga ile Konesula, o le Aso 1 o Iuni, o le a sisi ai le fu‘a a Samoa i Aukilani, ina ia tutusa ma le aso o loo sisi ai le fu‘a i Samoa. O le taimi nei, o le aso malolo o le Queens Birthday, lea e masani ona faatino ai le Sisigafu‘a i Aukilani.

E lē o vaosia foi e le afioga ile Konesula nisi faalapotopotoga e fia faia sa latou lava Sisigafu‘a ile aso malolo lea o le Queens Birthday, e mafai lava ona faatino lea Sisigafu‘a, peitai, e lē toe auai se Sui o le Malo i Sisigafu‘a ia.

O lona uiga o lea finagalo o le Konesula, e lē toe aloaia nei Sisigafu‘a o ni sauniga faalemalo. E tasi lava le sauniga faalemalo e auai i ai Sui o le Malo, o le Sisigafu‘a lea e tapena e le Konesula ma lona Ofisa ile aso 1 o Iuni. O se isi la Sisigafu‘a e fai e nisi faalapotopotoga, e lē o ni sauniga aloaia faalemalo.

Na fesiligia foi le afioga ile Konesula ile faatupeina o le Sisigafu‘a. Na tali manino le afioga Faolotoi, o le a faatupe lava e le ofisa o le Konesula le Sisigafu‘a, e leai se tupe e aumaia i se isi mea.

Ua lava lea saunoaga a le afioga a le Konesula e faaatoatoa ai lona naunautaiga, ina ia avea le Sisigafu‘a o le a faatino ile aso muamua o Iuni i tausaga taitasi, o le sauniga aloia faalemalo, e lē toe aiāina foi e se tagata poo se faalapotopotoga, poo se ekalesia foi.

Ona ole mataupu lenei sa faapea foi ona fesiligia ai le Fono Aoao a Samoa lea na faatuina e le Konesula. Na saunoa le afioga ile Konesula, o loo iai lava le Fono Aoao a Samoa, o le fono foi lea ua iai lona finagalo, o le a galulue faatasi ma lona Ofisa ile tapenaina o le Sisigafu‘a.

O le itu lelei o le saunoaga manino a le Konesula, o le a taofia ai le toe fesiligia o lea mataupu ile lumanai auā, o lea lava ua manino le mata o le vai ile saunoaga a le Konesula, a o lumanai le isi Sisigafu‘a ia Iuni o le tausaga fou.

Ua faamanino foi e le afioga ile Konesula, o le suiga ua faia nei, o le a tamau ma tumau ai lava ile agai i luma, poo ai lava nisi Konesula e toe tulai mai ile lumanai, o le a mulimulitai lava ile faavae lea ua ia faataoto e pei ona ia faailoa mai.

E iai se faaletonu sa aliae mai ile faamanatuina o le Sisigafu‘a o le tausaga lenei, lea sa faataunuuina ile Hall a le Ekalesia Aso Fitu Tutoatasi i Magele. O lea na faailoa mai e le taitaifono o le Fono Faufautua a Samoa, le tofa ia Faatili Ugavau Fuiavailili, ina ua mae‘a le sauniga lotu o le Sisigafu‘a ile Aso Sa e faapea, ua taofi e le Konesula le sisiina o le fu‘a ile taeao o le Aso Gafua e sosoo ai.

Na fesiligia le afioga ile Konesula i sona finagalo e tusa ai o lea mataupu. Na saunoa le afioga ile Konesula, na mafua ona ia manatu e taofi le sisiina o le fu‘a ile taeao o le Aso Gafua, ina ua faailoa atu ia te ia, o le fu‘a e sisi i totonu o le Hall, ae lē o fafo.

E maitau atu ile finagalo o le Konesula, e lē tatau ona faapumoomoo le sisiina o le tagavai a Samoa i totonu o se Hall, auā o tulaga aloaia i sauniga telele faapenei, e tatau lava ona sisi le fu‘a i fafo. E ui lava i lea, sa faatino pea le faamoemoe o le Fono Faufautua, na faataunuu lava ona sisi le fu‘a i totonu o le Hall.

O lea la ua manino le mata o le vai, ua uma foi le taumamate, auā o lea ua manino mai ile saunoaga  a le Konesula, o le a tapena e le Ofisa o le Konesula faatasi ma le Fono Aoao a Samoa le Sisigafu‘a o le 2017. E faataunuina lea faamoemoe ile Aso 1 o Iuni ile Maota o Samoa i Magele.