Faauuina Rosa Lei‘a o se Monike a le Kamalite

E ese foi lagona i le molimauina o faauuga faapenei. O le vaai atu i le loimata maligi ona o le mafutaga o le a motusia i le va o le afafine ma le aiga ae o loimata foi o le faafetai ma le viiga i galuega mamana a le Atua ua mafai ai e tamaitai ona ave le soifua atoa mo le galuega a le Atua e ala i le avea ma Tamaitai Sa. E fai lava la isi auaunaga a le Ekalesia Katoliko ae e pei o le taulaga lenei e ala i Tamaitai Sa Monike e tai foliga mai o se faamavaega ua fai faatasi ma le faauuga.

O le faauuga lona lua lenei o le tamaitai o Rosa Lei‘a, o Lotofaga ma Leulumoega. Ua faamautu ai i le sauniga na molimauina e aiga ma uo ma taitai o le atunuu faapea taitai o le Ekalesia Katoliko, le ofi sa‘o atu o lea tamaitai i le nofoaga o Monike.

E ono lelei tausaga na faamautu ai lona manaoga i lea tofiga a le Ekalesia a o lea faatoa aloaia loa e agai atu i totonu o lea nofoaga i Vailima i le mae‘a ai o le taimi atoa lea na aoaoina ai ma sauni ai le loto ma le agaga o lenei tamaitai mo le galuega a le Atua.

O le tiute ua iloa ai pea le ituaiga o le monike i totonu o le lalolagi, o le tatalo ma ua tele tagata e lē gata ia i latou i le Ekalesia Katoliko ua agai e talosia i latou e monike ae faapea foi ia i latou o isi talitonuga lotu faakerisiano e ese mai i le Katoliko.

O Rosa Lei‘a lea ua faauuina nei ma ua faasuafaina ia Sister Benedicta, o se alo faasino ia Taulia o Lotofaga ma Annamaria o Leulumoega. O le avea  ai o ia ma monike na ia ta‘ua o se manaoga ua leva ona nofo ma ia ma e faagaeetia i le mafai ona mae‘a o ana tapenaga ma ua ofi atu i lenei valaau tāua i lona tagata.

O le sauniga e faauu ai lenei tamaitai na molimauina e le afioga mamalu i le Ao o le Malo ma lana Masiofo. E le gata i lea na faapea foi ona auai atu i ai sui o le Malo ma taitai o le Ekalesia.

O le sauniga o le faauuga na faatautaia e le Afioga i le taitai o le Ekalesia Katoliko i le Akiepikopo, Moseniolo Alapati Mata‘eliga. Na faatumulia le malumalu o le Carmalites poo le Kamalite ma o le mae‘a o le sauniga na talia ai loa lenei tamaitai i le ituaiga lenei.

O le isi feiloaiga na sosoo ai o aiga ua oo atu i le nofoaga e faataga ai le agai mai o Tamaitai Sa ma feiloai ai ae o le pa ua vaeluaina ai lenei fesagaiga.

O le tulaga lava lea o le a iai ma o se sauniga e fai o le faanoanoa mo isi ae o le fiafia o isi auā e pei o lea ua faamavae atu lava e lē toe iai se mafutaga e mafai ona toe faia aemaise e lē mafai ona agai atu aiga ma uo i totonu o le lotoā lea e nonofo ai Tamaitai Sa nei.

O le ituaiga Carmelitte Monike i Vailima na faavae i Samoa i le aso 15 o Aperila  tausaga e 1959 ma o le ituaiga na amata e Sr Theresa o Avilla i le lalolagi ma faasolo mai ai i atu motu o le Pasefika.

Faaalia e le afioga Mamea, Sister Maria Elisapeta – o le faafetai o le maua pea e tamaitai o le Ekalesia o le manaoga e avea ma Tamaitai Sa o lea ituaiga.

O le tautinoga tumau ina ia mafai ona auauna i le Atua e ala i le saunia o talosaga mo le atunuu atoa ma le lalolagi.

O Tamaitai Sa o Monike i Samoa lea na faavaeina le nofoaga o Monike i Uea ma Futuna ma na avatu ai lava le toatele o Tamaitai Sa Monike mai i Samoa ma ua auauna ai i lea itu o le Pasefika.

O lea foi ua faavae atu i le Kamalite i Vailima le nofoaga o monike i Tonga lea ua agai foi Samoa e fausia le lotoā ma le malumalu tapuai o lea ituaiga i lea itu o le Pasefika.

Ua tusa ma le to‘a 11 monike ua i totonu o le lotoā lenei i Vailima i le taimi lenei ma le fuafuaga o nisi foi tamaitai o loo faatali le mae‘a ai o le ta‘iono tausaga o aoaoga ma sauniuniga e faauu foi faapea e pei o Sister Benedicta.