Faauuina faifeau fou Samoan Assembly of God

Ole aoauli ole Aso Faraile 14 o Aperila ile itula e 1 na tatala aloaia ai ma amata usuia ai le fonotaga tele ale Ekalesia Samoan Assembly of God i Niu Sila mai Invercargill seia paia luga nei i Aukilani.

O lenei fonotaga masani e faataunuuina pea lea ile vaitimi ole Aso Maliu ona e maua ai le avanoa mo tagata uma ole ekalesia e auai mai ai e faalogologo i nisi o mataupu ua faataoto ele Komiti Faafoe auā le lelei ma le agai i luma ole galuega ale Atua.

Ole Aso Faraile na tatala ai loa le mafutaga i fonotaga a itu tino eseese ole galuega e pei ole mafutaga ale Aoga Aso Sa lea sa taitaia ele susuga ile sui taitai ole ekalesia aoao ia Motu Matia, ole mafutaga ale CA poo le Savali a Keriso sa usuia lea ile malumalu ole susuga ile taitai aoao ole ekalesia le faafeagaiga ia Tafunai Toaseu Maiava i Mount Roskill, ole mafutaga a faletua ma tausi poo le fautua ole galuega sa faatinoina lea ile hall ale ekalesia i Magele, ma le mafutaga ale autalavou sa faatunuuina foi le latou polokalame i Magele.

Ole taeao ole Aso Toonai na usuia ai loa le fonotele ale ekalesia ile hall i Magele e talanoaina ai nisi o mataupu ua uma ona faataoto ma fuafuaina aua le manuia o ekalesia ma le galuega. O lenei fonotaga na auai ai susuga i faafeagaiga ma o latou faletua ae faapea foi i usufono filifilia mai i aulotu taitasi o lenei ekalesia, ma taualuga ai loa polokalame ole Aso Toonai ile polokalame ale autalavou.

Fanau talavou uma ale ekalesia ile taimi ole latou pese
Fanau talavou uma ale ekalesia ile taimi ole latou pese

Ole Aso Sa ole aso mulimuli lea ole mafutaga na tasi ai le sauniga tuufaatasi uma lava sa faia lea ile hall tele ale ekalesia i Magele, ma sa maitauina ai le latalata ile afe ma ona tupu tagata lolotu sa auai faatasi ai ma susuga i faafeagaiga.

Ua ese foi lagona o lea Aso Sa ina ua mafai ona tapuai faatasi le tino o Keriso mai aulotu eseese, ua maua le vivii faatasi o tagata, ae ua maua ai foi le avanoa e faafesoaa‘i ai le aufaigaluega totofi ale Atua e ala ile taitaiina ole sauniga aemaise ai ole folafolaina ole afioga Paia ale Atua.

E seasea maua se avanoa e galulue faatasi ai susuga i faafeagaiga ile tautuina ole faamanatuga i soo se mafutaga, ae tasi lenei o vaaiga sili ona matagoife i lea taeao ole tutu faatasi o faifeau ae galulue ile faasoaina ole tino ma le toto ole Alii ina ia faamanatu ai pea i tagata uma le tāua ole maliu ma le toetu o Iesu Keriso.

Ole susuga ile faafeagaiga ia Tofilau Iosefa Taula ole toeaina foi ole ekalesia mai Kalaiesetete na ia taitaiina le sauniga, ae ole susuga ile faafeagaiga ia Mao Lamositele ole failautusi aoao lea ole ekalesia sa nafa ma le faasoasoaina o polokalame ole taeao.

Ole taitai aoao ole ekalesia i Niu Sila nei ia Tafunai na ia taitaiina le sauniga ole faauuina o tofi o faifeau lea ua filifilia auā le galuega ale Atua i nisi o ekalesia a‘o nisi oloo galulue faaaposetolo ma faaevagelia i totonu ole galuega.

Ole folafolaina ole afioga ale Atua na manavaina lea ele sui taitai ia Motu lea sa ia faamalosi ai i aulotu taitasi i totonu ole matagaluega i Niu Sila e faapea, ‘Ia galulue i suiga fou lelei, ia oofu outou ile ofu ole amiotonu ma le faamaoni ina ia tatou galulue ai ile taiala ma le alafua na faataoto ele Atua mo lana galuega.’

Na faamae‘a polokalame ole Aso Sa ile laugatogi ale Aoga Aso Sa, ma le laugatogi ale autalavou ma tapunia aloaia ai loa le fonotaga ale Ekalesia Samoan Assembly of God i lenei tausaga ile saunoaga ale taitaifono.

E pei ona ta‘ua ele susuga ile faafeagaiga ia Mao Lamositele, ole failautusi aoao ole ekalesia, ole faauuga o faifeau e pei ona faataunuuina ile Aso Sa, e toaono faifeau laisene sa faauuina e aofia ai le susuga ia Taualai Siau ma le faletua, Kereti Kereti ma le faletua, Aufai Mose ma le faletua, Ioelu Tautaiolefua ma le faletua faapea Alex Yang ole a‘oa‘o ole ekalesia a‘o lea ua apalai lona laisene faafaifeau, ma le toatolu o faifeau faauu lea e aofia ai le susuga ile faafeagaiga ia Peter Vaifale ma le faletua, Nanai Solo ma le faletua faapea le susuga ile faafeagaiga ia Seuga Aumua sa galue faafaifeau i Samoa ile tele o tausaga ae o lea ua toe liliu lona tusi faifeau Samoa ile tusi faifeau Niu Sila ona o lea ua galue i totonu o Niu Sila nei, ma oloo iai foi ona tofi faiaoga ile tusi Paia, Aposetolo ma le faievagelia.