O le tu lea ma le masani a le Aoga a St Peter Chanel i tausaga uma, o le faatāuaina ma le faatinoina o le tala i le fanau mai o Iesu le pepe o le Kerisimasi, ae o le tolu ai lenei o tausaga talu ona faamanatuina taumafaiga ma a‘oa‘oga a fanau ua ta‘ilima tausaga e ala i le sauniga o le faauuga.
O le susuga i le Faafeagaiga Pastor Lui Ponifasio sa na ta‘ita‘ia le polokamale i se sauniga puupuu, a o lona afafine o Louise sa fai ma Master of Ceremony o le aso.
Na ese foi le tulai mai o le faatinoga o le tala e le fanau auā na logo i tino le tāua o le pa‘i mai o le uiga ma le agaga o le faatinoga o le tala o le Kerisimasi.
Na faatumulia le faleaoga i mātua ma uo aemaise foi o nai malo faaaloalogia ia i latou o loo faia pea le galuega o le fesoasoani ma lagolago mai i soo se galuegafai a le aoga ma faiaoga e pei o le susuga ia Ben Taufua mai le Iunivesite a Waikato ma Ruta Aati mai le Health Star Pacific.
O le aufaauu o lenei tausaga e to‘a sefulu-lua faatasi ai ma susuga i faiaoga e toalua o Makerita O’Brien ma Tofuola Aialeo na faauuina ai foi i lea aso.
O le polokalame mo fanau ua faasauni mo le ulufale atu i aoga tulagalua na saunia ai ni faailoga faapitoa e tusa ma a latou galuega faatino o lenei tausaga, ma na talisapaia lelei e nai mātua le faatalauula atu mo i ni sponsors o faailoga faapitoa.
O nei faailoga faapitoa sa faamanuiaina ai le tamaitai o Diana Kandoor (Most Improved) o Louise Ponifasio (Best Leadership) o Elika Tutagalevao (Most Confident) o Orlando Ah Kiau (Most Supportive) ia ma le alii o Jordan Filipo (Most Presentable Homework).
O lea ua faataitai ma faaa‘oa‘o uma atu lava i lalo i Aoga Amata le ola finafinau ma le ola tauivi o fanau ina ia fai ma auala e fiafia ai le fanau e ola suesue i le faagasologa o a latou aoga. Na mae‘a le polokalame manaia a le fanau ma le faauuga, ona agai loa lea i Totara Park mo le latou pikiniki ma faatalitali mai ai le tamaloa o Santa. Oka se fiafia o nai fanau ina ua tofu ma le meaalofa mai ia Santa.
