Showers of Blessings Samoan Christian Church
O se sauniga sa matua faatumulia i le paia o le auvalaaulia o uo ma aumea ma aiga, ma sa lagonaina ai foi le mamalu o le Atua, mai lava i le amataga o le sauniga e oo lava i lona faaiuga, i pesepesega aemaise o le Upu tomatau o le lauga autu o le aso.
Sa faataunuuina lava lenei Sauniga Paia ma le mamalu i le malumalu lava o le Ekalesia: Showers of Blessings Samoan Church i East Tamaki, i le 17 Nandina Ave, East Tamaki, i lalo o le taitaiga a le susuga i le toeaina, Rev Elder Fineaso Faavae ma le faletua ia Tausaga Faavae, ma o le taitai aoao foi lea o le Ekalesia.
Na mae‘a lea ona sosoo lea ma le taumafataga mamafa sa saunia lava e le paia o le Ekalesia, ma o se aso sa matua faatumulia i le fiafia ma le viiga o le Atua ina ua ta‘ape le auvalaaulia ma le faamalieina.
Tau ina ia saga faamanuia le Atua i lo outou sauni atu mo le laugaina o le Afioga Paia a le Atua, ma ia tele ni Agaga e aiaina mo le Atua ma lona finagalo mo a taeao ma le lumanai.
