Na faatumulia le Acacia Ridge Hotel na faia ai le faauuga a le Iunivesete a Griffith na o tamaiti Pasefika a o lumanai ai le faauuga tele. O lea faamoemoe sa faataunuuina i le afiafi o le Aso Toonai 6 o Tesema.
Sa taitaia i se tatalo e le susuga ia Bishop Fransic Iva. Sa faafeiloai faapitoa le tamaitai polofesa o le pule sili o le Logan Griffith University ia Professor Lesley Chenoweth faatasi ai ma le tufaga tusipasi sa maua foi se avanoa e saunoa ai i lea afiafi. O le Pule Aoga ulu o se tasi o aoga a le Ekalesia Aso Fitu o le Afio mai (Adventist College) o le susuga ia Jack Ryan mai Lalovaea.
E toasefululua le aufaauu ae o alo o Samoa sa aofia ai:
1. Senetenari Tamala sa maua lona Graduate Diploma of Education-Secondary School, ae ua mae‘a ona faauu i lona Bachelor of Arts i le 2012. Ina ua mae‘a le tasi tausaga o le isi vaega o lona taumafai faafaiaoga na faamanuiaina o ia ina ua maua lona avanoa e faiaoga tumau ai i le aoga a le Katoliko (Chisolm Catholic College) i le 2015.
2. Mekemeke Lavaki sa maua le Bachelor of Science Majoring in clinical Science.
3. Martina Donaghy sa maua le Master of Development Practice.
4. Alexa Faalogo na maua le Bachelor of Commerce majoring in Accounting. E ui lava ina aoaoina le poto faaleolaga nei peitai ua sauni nei o ia e amata lana faamisiona i le ekalesia a Iesu Keriso o le Aupaia o Aso e Gata Ai i le aso 18 o Tesema mo le 18 masina.
5. Kirstine Kira ma maua lona Bachelor of Nutrition and Dietetics.
6. Whihis Paramore-Baice na maua lona Bachelor of Business information systems.
7. Dion Enari sa ia maua le Master of International Relations.
8. Site Elenai Ioane na faauu ma lona Bachelor of International Business, o le alo lea o Ioane ma Nifo Ioane. O lona mitamitaga ona o ia se tamaitai muamua i lona aiga ua faauu ma tauaaoina se faailoga tikeri.
9. Kuini Tuato na maua le Master of Education ua mae‘a ona faauu i lona Bachelor of Arts i le 2004, maua lona tusipasi i le aoaoina o le gagana peretania. Na te manatua pea le quote poo saunoaga a Nelson Mandela: Education is the most powerful weapon we can use to change the world.
10. Taralina Gaee-Atefi sa faauu nei i lona Master of Medical Research majoring in Epidemiology and Population Health. Na faauu mai o ia i Fiti i le School of Medicine i le 2008, maua foi lona Bachelor of Science i le 2011 sa avea foi o ia ma Miss Samoa 1999-2000 a o lea ua toe faamanuiaina i lea foi faailoga taualoa.
11. Aofaiga Junior Levi na maua lona Bachelor of Business Double Major in Human Resourse Management and International Management. O loo galue Junior i le matagaluega o Telecommunications Management.
12. Kim Carmichael na maua le Bachelor of Nursing.
E momoli le agaga faafetai i nei alo ma fanau aemaise nisi o le atunuu i le sogasoga ma le soifua fia tauivi ma saili pea le atamai auā o le tele o le aoaoina, o le faamanuiaina foi lea i le fesuiai o galuega ae talitonu e faamoemoe i le Atua o tatou manaoga uma.
O se luitau i alo ma fanau e taumafai pea, aua le faavaivai ae o le malosiaga o ia mea uma o le tatalo faatasi ma le faamalosi a mātua aemaise o aiga.
Faafetai i nisi o alo o le atunuu o feagai pea ma le faatautaia o lenei vaega i tausaga uma, Emma Tanuvasa, Francella Timu, Glenda Stanley ma nisi ua lē māua faapea Susanne Wilkinson o ia o le Manager, Student Equity Outreach & Educational Partnerships, Griffith University.
