Faauuga a le “Ia Malamalama Agape Bible College” i Melepone

“Ua faaumatia lo‘u nuu ina ua leai se poto. O oe foi na e tetee atu i le poto, o le mea lea ou te tetee atu ai ia te oe. E lē fai oe ma ositaulaga ia te au. Ua e faagalogalo le tulafono a lo‘u Atua, o a‘u foi ou te faagalogalo i lau fanau”.

O le manulauti lea ma le finagalo o le Tusi Paia ua faavae i ai le Kolisi e pei ona faatuina i laufanua o le aai tele o Melepone i nai tausaga talu ai, ma amata a‘otauina mai ai tamalii ma failauga o faletua ma tausi, faafeagaiga faapea tama ma teine talavou o le atunuu o sailimalo i lea tafa o Ausetalia.

O le Aso Toonai na tuanai atu na tauaofia ai aiga ma uo o le au faauu, tainane Samoa na potopoto a o le mamalu i ekalesia e fia, i le malu o le Epping Memorial Hall, e patipatia faatasi le taulaga o le faafetai ma molimauina le faaeaina i le mae‘a ai o le taua o mafaufauga ma le sailiga atamai sa feagai ai ma le aufaau.

O le lona lua ai lea o faauuga a le kolisi talu ona faavaeina i Melepone, saunoa faafeiloai le taitai o le sauniga le susuga i le faafeagaiga ia Rev Leaega Fialelei mai le aai o Sini, molimoli mai tagavai o atunuu eseese o lo ua tatalaina ai le kolisi, alala foi le aufaauu, amataina lea o le sauniga i le tatalo na saunia e le taitai aoao o le AOG Samoa Pastor Onesemo Pulepule, faaiuina le taulaga o viiga e le faafeagaiga ia Rev Sione Fereti Percell mai le aai o Perisipeni.

Ona saunoa lea o Rev Dr Peniamina Williams ma ia faapea ai, “E tua Nuuausala ia Vaialua” o se mua fetalai i le kolisi o Nuuausala ma le pitonuu o loo tu ai o Vaialua, o lona finagalo, e tua Ekalesia i aoga lelei, o se finagalo na taoso ma tomatauina ai le isi laasaga fou mo le aufaauu.

O le failauga faapitoa o le susuga ia Rev Dr Ieti Mageo o le faauluuluga aoao lea o le kolisi atoa i le Lalolagi sa malaga mai Hawaii, Pastor Apouani Unasa na nafa ma le foai, ona faalauiloa lea o le tama faauu ua sili ona maka ma togi i lenei tausaga o le susuga lea ia Afaaso Lata ma fai ai lana saunoaga ma sui o le au faauu, ona amata loa lea o le faauuga ma tufa tusipasi.

O le faletua ia Simotu Williams na fofogaina suafa ae faafeiloai e Dr Ieti ma Dr Peniamina ma tauaao atu o latou Tusipasi ua faaeaina ai. E to‘a 11 na faauuina i le Certificate of Completion, ae to‘a 31 na faauuina i le Associate of Theology, faaee aao o le Aufaigaluega ma faapaia ma faamanuia i soifua tautua o le au faauu e ala i le tatalo na taitaia e Pastor tanu Allan, ona faali lea o valevale alofa o aiga ma uo, faamatafi ai i le taumafataga tele i le malu o taumafataga i Lalor ma maau ai le kolisi i faaaloaloga masani, ma faatofa atu i lenei tausaga ma ona taualumaga.

O outou māmā na, Faamanuia le Atua i o tou laasaga fou.

‘Ata laia auā e suamalie ma aulelei le faaeaina – nisi o le aufaauu ma tauaiga Susuga Afaaso Lata (lona 3 mai le itu agavale) na sili i le aufaauu, ma ona tauaiga….malo le finau