‘Na lulu ma le tiga, ae ua selesele ma le fiafia.’ O upu ia e faamatala ai le galuega mae‘ae‘a sa feagai ai ma tausaga e tele i le taumafai atu o tatou tagata Samoa i aoaoga i aso o faauuga faapenei. Na faatumulia i aiga, mātua ma uo aemaise o faifeau fomai Drs le malumalu o le susuga ia Kome i Porirua mo le sauniga mamalu ma le fiafia o le faauuga ona ua faaiu manuia le taumafai o le 83 tagata na faauuina i faailoga. Na auai foi susuga i Fomai (Drs) mai Hawaii ma Amerika e foaia nei faailoga tāua o le Tusi Paia.
O le tausaga muamua lenei ua oo atu ai i le faauuina o Master of Arts in Theology le Kolisi o le Tusi Paia talu ona faatuina.
O i latou ua maua MA in Theology, o Simotu Williams, faletua o le Fomai Dr Peniamina Williams mai le afioaga o Matatula i Amerika Samoa, Pastor Faletolu Faaoloviti, o le faifeau mai le Divine Love Church i Stokes Valley, (Fasitoouta) faapea le susuga ia Pastor Saunoaimalu Arona Taotua, o le faifeau mai le ekalesia i Titahi Bay, ae mai le afioaga o Salelologa.
Sa faauuina i Hawaii se toalua mai lea Kolisi i le amataga o le tausaga, i o laua foi o faailoga o le Master of Arts in Theology. O le susuga ia Pastor Timoteo Williams (Salelologa) mai le Bible Church i Porirua, ma le susuga ia Setu Kereti mai Fogapoa i Savaii.
Na aofia i lenei faauuga i latou mai Hastings, Te Puke, Kalaiesetete, ma Ueligitone na faauuina i o latou faailoga eseese o le Tusi Paia.ft. Certificate of completion – Tausaga muamua, Associate of Arts in Theology ma le B.A. in Theology mo i latou e ta‘i fā tausaga o aooga.
O le Aso Sa na tea nei faia ai se sauniga faamavae mo le tausaga a le aoga o le Tusi Paia i le maota o le ekalesia i Kenepuru, ma sa taitai le susuga i le Toeaina ia Pastor Kitiona Kereti i le tatalo, o le Fofoga o le sauniga faamavae o Pastor Timoteo Williams. O i latou nei na maua ai togi faapitoa i lea sauniga.
O togi maualuga o le tausaga na manuia ai: Tafiaina Luuga, Tafea Samuelu, Val Williams ma Sitione Luuga. O ē na maua sikolasipi o le Ministry sa saunia e Dr Peniamina Williams ma le faletua na maua lea e Willie Onosai, e ‘afa le totogiina o lona pili i le 2016 ae o Salu Leota e atoa le tausaga e aoga fua ai.
Na saunoa le susuga i le Puleaoga Dr Peniamina Williams e faafetaia le taumafai o i latou ua faamanuiaina ma ia ta‘ua ai o le 8 lenei o tausaga talu ona fai faauuga a le AGAPE, ae o le fitu lenei o tausaga o fai koneferenisi mo le faalauteleina pea o le silafia o le fanau a le Atua i lona finagalo.
E faamalo atu foi la tatou itulau ia i latou uma ua faamanuiaina i lenei tausaga. Manuia taumafaiga o le a toe alo atu i ai i le 2016.
Certificate of Biblical Studies
1. Tafiaina Luuga
2. Angela Taupale
3. Willie Onosai
4. Anastasia Samuelu
5. Eni Poluleuligaga
6. Lila Sagale
Associates of Arts in Theology
1. Faaalo Val Williams
2. Peni Valeliano
3. Tafea Samuelu
4. Salu Leota
5. Pou Miti Poluleuligaga
6. Righteous Lepa Williams
7. Matatula Williams
8. Papa Tusa
9. Fiu Sopoaga
Bachelors of Arts in Theology
1. Sitione Luuga
2. Kelekolio Kelekolio
3. Alofagia Tumaai
4. Fuisa Taotua
Masters of Arts in Theology
1. Simotu Williams
2. Saunoaimalu Taotua
3. Faletolu Faaoloviti
