“Telē le sao o le Best Training mo fanau a Samoa”
O le 60% o fanau sa faauu i le Best Youth Academy o alo ma fanau Samoa, ona sosoo ai lea ma Tonga, e iai foi nisi o alo ma fanau mai nisi o atunuu. O lea polokalame o se tasi o vaega o le aoga a le Best Trainning ua fuafuaina mo fanau poo tupulaga talavou mai le 16 tausaga e oo atu i le 19 tausaga, na o ese mai i Kolisi sa aooga ai ae lei mae‘a le aoga, faatasi ai ma fanau ua iu i le kolisi ae lei faamanuiaina atoatoa le taumafai.
O le polokalame lenei a le Best Youth Academy ua fesoasoani tele mo nei fanau e toe faaauau ai le suesueina o le poto salalau auā le sailia o ni galuega mo so latou lumanai manuia.
E eseese tausaga na tauaveina ai e fanau mataupu ina ia mafai ona latou ausia le tulaga maualuga e maua ai galuega. O nisi o fanau e ave le mataupu i le tasi le tausaga a o nisi e uma le tausaga e tasi ae toe faaauau i le lua tausaga auā o le tusipasi sili lea ona tāua ma manaomia e ulufale atu ai i galuega.
O isi fanau e uma le lua tausaga ua mafai ona faaauau i le MIT, AUT, UNITEC poo le University, auā e iai fanau sa maua togi i le taimi a o iai i le kolisi ae lei lava ona maka e ulufale ai i Iunivesite.
E iai foi tamaiti ua uma le tausaga e tasi ae maua maka sa lei maua uma mai kolisi sa aooga ai, a o isi fanau ua faauu mai le lua tausaga ua maua tusipasi, ae ua lē fia o i le Iunivesite ae ua fia o e faigaluega.
O nisi o loo galulue i galuega ae o loo aotauina i lea polokalame, e uma le lua tausaga sa aoga ai ae foi atu ma le tusipasi o le Level 2, lea ua sii ai le totogi toe sii ai ma le tulaga i le galuega.
O le polokalame e faaautu lava i fanau i le 16 tausaga i le 19 tausaga ma e lua tausaga e sailia ai tusipasi. O le avanoa o loo maua mai le malo e ala i le faatupeina o loo maua ai le fesoasoani e aooga fua ai nei fanau, e lē gata ina totogi fua mea uma ae maua foi le alauni.
O le polokalame foi lenei e mafai ona sailia ai le laisene avetaavale mai le laisene muamua seia maua le full laisene.
A fuafua i ai le faatupeina o lenei aoga i le lua tausaga pe tusa ma le $1,0000.00 ae faafetai i le Atua ona o lenei faamanuiaga ua maua ai e fanau le avanoa e toe faaauauina ai aoaoga e sailia ai galuega.
O se polokalame na tuuina mai le malo e foia ai le faafitauli o loo tulai mai i le toatele o tamaiti o le Pasefika e o ese mai aoga maualuluga ma kolisi, ae e maua togi e agai ai i luga i le AUT ma isi aoga maualuluga ma le Iunivesite. O se manulauti ua mafai ona toe auli atu ai ma faaulufale ai tamaiti a o lei see atu i le Iunivesite.
O le afiafi o le Aso Tofi 28 o Ianuari na tumutumu ai se vaega o le malae i Eden Park i aiga o uo ma ē masani na agai atu e molimauina alo ma fanau ua faauuina mai i le Best Youth Academy.
Ua militino faatasi tagata eseese o le Pasefika, sa faalogoina foi gagana a atunuu taitasi i le tau fai valaau o mātua e faamanuia i taumafaiga a a latou fanau. Na tau faaofiofi nofoa o le fale i le lolofi atu o tagata e tali le tautiga sa alo i ai a latou fanau aemaise o le tapuaiga sa iai mātua.
O le susuga i le faafeagaiga ia Rev Alesana McCarthy na taitaia le polokalame i le sauniga lotu, ona sosoo lea ma le saunoaga a le tamaitai ia Rachel Skudder o le Pule Sili o le Best Pacific Institute of Education.
O le susuga ia Dietrich Soakai na saunoa i le saunoaga autu o le aso e faamalosi ai mo tupulaga talavou i le 16 tausaga i le 19 tausaga, faatasi ai ma le saunoaga a le susuga ia Colin Tua‘a o le Pule Sili o le polokalame a le Best Youth Academy. Na saunia foi pesepesega a fanau faauu e faailoa ai lo latou agaga fiafia i mātua ua iu ma le manuia le faatamasoaliiga sa alo atu i ai.
E 280 fanau sa faauu tusipasi mai mataupu eseese sa tauaveina, e pei o le Certificate in Employment Skills Level 1, Certificate in Business, Enterprise and Technology Level 2, Certificate in Retail and Computing Level 2.
Isi Faailoga – Certificate in Health, Recreation and Sport Level 2, Certificate in Performance and Performing Arts Technology Level 2, Certificate in Tourism Level 2, ma le Certificate in Tourism and Services Level 2.
O nisi o fanau sa faamanuiaina Level 3, Certificate in Business, Enterprise and Technology Level 3 ma le Certificate in Freight Administration Level 3.
O loimata o le fiafia na vaaia i lea aso i mātua a o fusi atu i lana tama ma le loto faafetai ona o le tali mai i le manaoga o le loto ia manuia lana taumafai.
Na toe faaiu le polokalame o le afiafi i le viiga faafetai i le Atua lea na toe saunoa mulimuli ai Rev Alesana McCarthy i le tatalo faaiu ma faaauau ai le mafutaga i le iputi māmā.
Ae o le agaga faafetai a nisi o tamalii o le atunuu o loo galulue i le Youth Academy i mātua ma aiga ona o le lagolago ma le tulai malosi mai e unai fanau e faatāua le avanoa e aooga ai auā so latou lumanai manuia.
