Na faataunuuina le faauuga a le IMABC i Brisbane i le Aso Toonai aso 13 o Setema, auā foi le faaiuga o le 4 tausaga sa tausinio mai ai nisi o le atunuu i le a‘otauina o lo latou soifua auā le Atua ma lana galuega.
E pei lava ona silafia le anava a lenei Kolisi a le IMABC o le fesoasoani lea i le a‘otauina o le Tusi Paia auā le tapenaina o le soifua o le atunuu i soo se vaega o le gauega a le Atua, e pei o le tulaga faafolafola e aofia ai aoao, failauga, tiakono e oo lava i le galuega faafaifeau, faapea foi ma nisi o le atunuu o loo fia faalautele lo latou silafia i le Afioga Paia a le Atua.
Ua 6 nei tausaga talu ona amataina le tautua a lenei Kolisi i totonu o Brisbane nei. E toafitu nisi na faamanuiaina i le faailoga o le B.A degree e aofia ai Taatiaifogaega Mavaega, Olive Fonoti, Ps Sitevili John Ioane, Ps Fetaia‘i Samuelu, Rev Leiuli Amani, Wiki Kaio, Rev Siaosi Mavaega.
E toatasi lē ua faamanuiaina i le faailoga o le A.A Degree o le faletua o Tagiilima Logo. O le sauniga na taitaia lava e le susuga ia Ps Ferdie Jahnke, o le failauga o le upu a le Atua auā foi le tomatauina o le au faauu, o le susuga i le Peresetene aoao o le IMABC i le lalolagi, o Dr Peniamina Williams. O le susuga ia Dr Ieti Mageo sa feagai ma le tatalo e faapaiaina ma le faamanuiaina o le au faaiuaso.
Sa auai mai foi le peresetene o le kolisi a le IMABC i Sydney susuga ia Ps Leaega Faalelei ma le faletua, faapea foi le peresetene a le kolisi fou e pei ona tatalaina i le masina na tea nei i Logan City i Brisbane lava, Ps Fereti Purcell ma le komiti faafoe.
Na faaiuina lenei faamoemoe i le viiga ma le faafetai i le Atua, ona ua tau lau o le faamoemoe, e pei ona tauivi mai ai le au faaiuaso i lenei 4 tausaga.
Na vaaia foi le laufofoga maligi, o loimata o le fiafia ma le olioli, auā o le 4 tausaga e lē o se taimi puupuu, ae peitai e lē o le amataga ae o le faaiuga o se mea, tatou te faamaonia ai, ana leai le Atua, tatou te lē mafaia se mea.
