Faauuga ale Vasega English NZCL Level 3

Nisi o Tamalii ma tina sa faauuina ile course Igilisi
Nisi o Tamalii ma tina sa faauuina ile course Igilisi

O avanoa ma faitotoa ua tatala mai i totonu o Niu Sila mo tagata Pasifika, ae faapea foi i isi atunuu ole lalolagi poo tagata mai le atu Asia, o lea ua mafai ona maua le isi luitau ma le isi faamama avega e ala lea ile sailia o galuega mo tatou tagata i totonu o nei atunuu.

Ole toatele o tatou tagata, o tagata faatoa malaga mai Samoa o lea ua mafai ona latou faatāuaina lenei avanoa e toe faalautele ai le malamalama ile gagana Peretania poo le Igilisi mo le toe sailia o a latou galuega.

Ole mataupu lenei ile Igilisi (English) Level 3 e to‘a 24 i latou sa faauuina ai ile afiafi ole Aso Tofi ua mavae, aso 23/3/2017 ile Marae i Otara, ma o i latou nei sa aotauina ile 6 masina ile tausaga ua mavae 2016, mai ia Ianuari ia Iuni le kuata muamua ae o Iulai ia Tesema le kuata lona lua, ma o lea faatoa tufatufa aloaia ai a latou Tusipasi lenei ole NZCL.

Ose fiafiaga ia i latou nei ona o lea ua faaiu ma le manuia la latou taumafai, auā e le ose mea faigofie le faatinoina o lenei avanoa ona ole tele ole taimi oloo feagai ai i latou ma galuega ae o lenei oloo tulituli mai foi le taimi e ave ai le course ina ia mafai ona ausia se isi laasaga maualuga i totonu o galuega.

E fefiloi lava tagata oloo faatāuaina lenei avanoa, o tagata mai Asia oloo tele ina aotauina i mataupu ile taeao ae o tatou tagata mai Samoa oloo tele ina aotauina ile afiafi mai le 5 seia oo ile 10 ile po ma oloo galue ai le faletua ia Fualilia Hakai Mafi. O nisi sa leoleo i Samoa, o nisi sa faiaoga ma faifeau o lea sa faauuina ai i lea afiafi.

O lagona ole fiafia ma le viiga ile Atua ile tele o aiga sa molimauina lea afiafi ona ua mafai ona ausia e a latou fanau faapea nisi o o latou aiga le isi laasaga fou o tulaga i aoaoga i Niu Sila nei, aemaise lava ile mataupu lenei ole igilisi, auā ole gagana lenei oloo tele ina fesootai ai tagata uma i atunuu i fafo i totonu o galuega, falemai, aoga ma isi lava mea i totonu o Aotearoa.  Pei ona faailoa ele faletua ia Fualilia faiaoga lea mo tagata Samoa, ole tāua o lenei tusipasi ile Igilisi ose faitotoa poo se faamalama lea ua matala ai le faia o lau Tusipasi ole Diploma i galuega faafaiaoga, galuega faafomai, leoleo ma isi lava galuega, auā ole mataupu lea e fesootai ai tagata uma.

Ma o lea ua faamanuiaina ma faauuina le 24 o tamaiti aoga nei mai le 2016 ae o lea foi ua amata le isi vasega ile tausaga lenei, lea sa amata ia Ianuari ae faauma ia Iuni ona toe sosoo atu ai lea ma le isi vasega.