O le vaitau lenei o le seleselega na vaaia ai le lolofi atu o mātua ma aiga e molimauina le faauuga a le Aoga Amata a le Aiga Salevalasi i Glen Eden. O se faauuga na maoae tele, ona o le tomai ma le talenia o alo ma fanau o loo aoaoina i lea foi aoga.
O le tele o polokalame o le aoga na faatautaia lava e tamaiti, lea e na o le tai lima tausaga le matutua ma lalo ifo. A o lei amataina le tufatufaina o tusipasi a le aufaauu, na amata foi lava i se sauniga puupuu, e faafetaia ai le alofa o le Atua ona ua faaiuina ma le manuia lenei tausaga i galuega fai a le aoga.
O le susuga i le faafeagaiga ia Paulo Ieriko, na feagai ma le sauniga, ma na faamamafa ai le tāua o tamaiti i le faiva a Iesu a o iai i le lalolagi. O se tasi o vaaiga mataina o lea afiafi, Aso Faraile 4 o Tesema 2015, o faafiafiaga, lea na matautia le leo lelei o alo ma fanau, faapea le atamamai o tamaiti e tautatala i le Gagana Samoa e ala i lauga ma nisi o faatinoga.
O le fofoga o le po na nafa lea ma le tamaitai pule ia Alofa Sivao, ae lagolago ai le tamaitai ia Fofoga Tiumalu, o ia lea o le taitaiulu (Supervisor) ma le mamalu o le aiga faiaoga.
O le mae‘a o le aso fiafia o nai tamaiti, na saunoa ai le susuga ia Ropati Sivao e faafetaia le lagolago o mātua i lenei tausaga, ona alo ai lea i se taumafataga na saunia lava, e le Pulega, ma mātua aemaise susuga i faiaoga, ona tatala ai lea o le fili alii ina ua tea le itula e 8 i le afiafi.
Le lisi o le aufaauu:
•Netalina Aitu
•Psalms Falani Sa
•Meleane Fareti
•Katelyn Hill
•Sam Isara
•Harmony Kavana Avealalo
•Gideon Konelio
•Azalier Mati
•Talalelei Lepapa Tui Savaii
•Sala Maifala
•Milly Nanai
•Ron Sefika
•Ezekiel Ieriko
Faamatalaga na tuuina mai
