Na faaiuina i le afiafi o le Aso Toonai galuega o le tausaga a le Fue Felafoai o loo aoaoina le gagana Samoa i le aganuu i lalo o le faamalu a le Leo o Tagata Samoa i Logan City lea o loo Peresetene ai le tofa ia Faimalotoa John Pale.
O le fetalaiga lava ia Le‘autuliilagi Sogialofa Malaeoalii Vaa Leapai o le faiaoga ma le Faatonu o lenei Aoga sa fai ma fofoga o le po.
E maofa le loto i nisi o alo ma fanau tutupu a‘e i nei atunuu ua vaaia le naunau ma le faamemelo i le gagana ma le aganuu, o le taliina o paolo o se maliu, malo usu i se malaga, pe o taliga foi o paolo o faaipoipoga, sulaina o toga i nisi o tina ma le tele o vaega ‘anoa sa maimoa i ai le auvalaaulia i le po anapo.
Na iai lauga autu e pei ona iai le susuga i le Alii Minisita o le Soifua Maloloina a le Setete o Kuiniselani Hon Cameron Dick, Councillor a Logan City, susuga ia Steve Swenson sa tauaaoina tusipasi Level 1 ma le Level 2 o le aufaauu e to‘a 14.
Sa auai foi le afioga i le Taitaifono Aoao o le Mafutaga Tuufaatasi a Samoa i Kuiniselani le Afioga ia Lemalu Taulapapa Roy Slade & faletua ia Joyita, sui convenor o le leitio 4EB, afioga ia Tauiliili Ata Peseta ma le faletua ia Elisapeta Malifa, Josephine Aufai o loo tamoe mo le tofi Division 2 o le Council a Logan City, faapea Eseta Frost o le faatonu o le Samoa Victim Support a QLD ma nisi.
O le toatele o malo valaaulia na mamalu ai ma matagofie le po ma molimauina ai le tāua o lea foi aoga i le faa‘oaina ai o nisi o alo o le atunuu faapea matai e fia utuvai i le punavai o le aganuu.
Sa auai le aufaafiafia ae faapa‘ō mai e le DJ a le tama o Scott ma le vaega. Na faaiuina i se taumafataga tele e fiafia le auvalaaulia, aiga ma uo faapea nsi o le mafutaga a le Leo o tagata Samoa.
