Faauu sui o le ofisa o le Fono ma tusipasi, tipiloma ma tikeri

E silia i le to‘a 20 le aofai o le aufaigaluega a le ofisa o le fono na faamanuiaina i ni tusipasi mai i le Iunivesite o Tasmania i Ausetalia ina ua mae‘a nisi o aoaoga sa auai ai, e siitia ai le tomai i le faatinoga o galuega faaofisa o le fono.

O lenei faauuga e afua mai i lalo o se faapaaga a le Palemene o Samoa faapea foi ma le Palemene o Tasmania i Ausetalia, lea ua maua ai avanoa e faalautele ai le tomai o le ofisa o le fono auā le faatinoga o o latou galuega.

E lua ituaiga o tusipasi lea na taulimaina e sui nei o le ofisa lea e to‘a 20 na maua tusipasi o Tulafono ma Galuega faapalemene, faatasi ai le isi to‘a 12 o tusipasi faavae o tulafono ma galuega faapalemene.

Na aofia ai lē sa avea ma Fofoga o le maota i nei aoaoga e pei ona tusia faapitoa lava mo le aufaigaluega o le Fono. Saunoa Laaulialemalietoa Leuatea Polataivao Schmidt o le faatumutumuga o nei mea uma o le lelei faatino o le galuega i ofisa o le fono i le maualuga e tatau ona oo i ai.

O le faamatalaga a le alii Polofesa mai Tasmania Richard Herr, o Samoa le isi atunuu ua maofa tele ai le tomai o le aufaigaluega a le fono, ma o nei tusipasi ua taulimaina ua aumai sa‘o lava o sui faauu o le Iunivesite i Ausetalia.

E fā tausaga na tuufaatasi ai e Palemene e lua lenei polokalame ina ia mafai ona maua le avanoa e toe faalautele ai le tomai o le aufaigaluega i mataupu e patino tonu mo le Palemene.

O tusipasi, tipiloma ma le maualuga o aoaoga e agai ai i le faailoga o le Masters poo le Post-Graduate Studies lea ua ausia e i latou na faauuina.

O le faaiuga o le tausaga na tea nei sa faia ai le faauuga tele a le Iunivesite i Ausetalia ae o lea faatoa oo mai le alii polofesa e faia le faauuga faapitoa mo le ofisa o le fono lava ia i Samoa i le faaiuga o le vaiaso na tea nei ma o faailoga nei ua amanaia i Ausetalia.