O le amatalia o le aoga mo le gagana Samoa i le tausaga talu ai i Sini nei ua vaaia ai le gasolo atu o le fanau ma le mamalu lautele o le atunuu e resitara i ona vaega eseese ma ua moomia ai foi le sailiili o ana faiaoga mo laasaga sili atu.
O le vaiaso la na mavae atu na faauuina ai ni sui se toatolu o le Aoga Gagana Samoa i Sini ma ni o latou faailoga i le gagana poo le Community Language School mai le Iunivesite o Sini i faailoga. Na saunoa le tamaitai ia Maria Tuitama, o se vaega tāua tele lenei mo le auaunaga auā le siitia o le tautua i totonu o le aoga lea ua ausia ai nei Certificate i le gagana e nei sui e toatolu.
O i latou ua faauina e aofia ai le Susuga ia Laufilitoga Joseph Ah-You, Lisi Sheppard Ah You faapea Julie Fatu. O le tamaitai o Lisi Shepperd Ah-You o lona nuu o Gagaifo Lefaga. O le susuga ia Ps Laufilitoga Joseph Ah-You e mai le afioaga o Saleimoa ma Afega, faapea foi le tamaitai o Julie Fatu o Afega ma Saleimoa.
Ua toe amata nei vasega o le aoga Samoa i ona pitonuu e lima o loo iai nei e amata mai le vasega amata agai atu i le vaega matutua mo i latou faatoa maua le avanoa e aotauina ai i le gagana Samoa aemaise lo latou faasinomaga.
O le tatalaina o lenei aoga i Liverpool i le tausaga talu ai na faatasi atu i ai le Pulenuu o Liverpool le afioga Ned Mannoun faapea taitai o Fono e lua a Samoa i Sini le Fono Aoao a Tagata Samoa faapea le La‘u Samoa.
O le faaiuga o le tausaga talu ai na faatoa faafofoga ma silasila ai mātua i lauga ma pese faapea faafiafiaga Samoa a sui laiti o le aoga seia oo atu i vasega matutua i sa latou faaaliga muamua. O le alii taalo liki lauiloa ia Roger Tuivasa Sheck na auai i lea po e fai ma malo faaaloalogia a le Aoga Gagana Samoa ma faailoa le tāua o le tu ma agaifanua a Samoa i lo latou tuputupu a‘e i Ausetalia nei.
