Auā o le tama poto e fiafia ai le tina, ae o le tama valea e faanoanoa ai le tina. Ae fai mai foi le muagagana ua masani ai lo tatou atunuu, o le mata‘u i le Atua, o le amataga lea o mea uma. O se aso na maualuga ai le viiga o le Atua, le Aso Toonai ua mavae 10 o Me i le hall a le Ekalesia Metotisi i Manukau i Aukilani, o loo taitaia e le susuga i le Sea ia Rev. Masunu ma le Faletua ia Senerita.
Na matuai faatumulia le hall i le toatele o le valaaulia ma i latou na faatasi ai. Na amata i le sauniga lotu na taitaia e le susuga i le Sea, na toe faamanatu ai foi i le tamaitai ua faauu mai ma le manuia, le taiala mo soo se talavou aemaise i ona po nei i le malosi o le alii o le lalolagi, o loo lepeti i le lumanai o alo ma fanau ia latou taumafaiga.
O se aso fiafia tele auā na faamanatu ai foi ma le 21 tausaga o le tamaitai faauu. Na tulai le tausala na ‘auga i ai le faamoemoe, le Afioga ia Falenaoti poo lana Afioga Talaleu, Sili Mireta Pita-Moemalo mo lana saunoaga i lea aso, ma o se faalogona e faagaeetia ai le loto, auā na matila ai i le faalogo ma le vaai, le faamuamua e lenei tamaitai o le Atua i lona olaga o se tamaitai talavou, i lana taumafaiga lea ua iu ma le manuia. Amuia ona mātua i se tamaitai faaaloalo ma amio tausaafia!
O le afioga ia Usoalii Pita o le uso o le tuaa o le tamaitai o Sili na avea ma fofoga o lea aso ma o le amataga o le masina nei o Me na faauu mai ai le tamaitai o Sili mai le Iunivesite o Aukilani i le Bachelor of Arts e pei ona patipatia e lona aiga, Ekalesia, uo ma ē masani. I le saunoga a le tamaitai o Sili i lea aso, na momoli faapitoa ai lana faafetai tele i ona mātua faaleagaga le susuga i le Sea Rev. Masunu ma le Faletua ia Senerita, ona o le timai i lona olaga faaleagaga faapea talosaga, ua iu ai ma le manuia lona faamoemoe.
Ae na maligi loimata o le tamaitai ina ua oo lana faafetai i nai ona mātua aemaise i si ona aunty ia Fono Hana Moemalo sa tele sona sao i lana taumafaiga, ona o lo latou alofa mafana, mafutaga vavalalata, onosai, fesoasoani ma le faapalepale i taimi o ana taumafaiga. O se tasi o itu tāua na maitauina, o lana faafetai faapitoa i si ona tuagane pele le alii o Ioane Pita, i lana puipuiga faaletuagane, lona alofa, lana lagolago, ma le taimi e momoli ai ia i le aoga ma nisi faamoemoe e fia auai i ai.
O se vaega ua seāseā ona maua i lenei vaitaimi, se mafutaga vavalalata i le va o se tamaitai ma sona tuagane, ma o se tasi lea vaega tāua na faamautu ai, le va tapuia o Sili ma lona tuagane e pei ona molimauina. Na taualuga le fiafia tele i se taumafataga tele na saunia, faapea faafiafiaga, faatasi ai ma le siufofoga mālie o se tasi o tamaitai lauiloa o Samoa i lona siufofoga mālie o Marina Davies.
Na sausaunoa le tamaitai ia Sili e taualuga lona aso faapitoa, ma e maeu foi le onomea o le tausala i lana saasaa faasamoa, auā na leai se mata na toe ‘emo a o tapisa le tausala i ona faiva manaia i lana siva samoa. Auā e te faia lava e oe mea silisili ma e toe manumalo ai. Ia sagai ane ‘ai o le tai auā se lumanai manuia, auā e lelei le Atua i taimi uma, na te faatonu foi ia te oe i mea lelei uma. Ia tumau i lou ava ma faaaloalo i soo se tasi, ma ia agalelei le Atua i ou ala uma.
Alofaaga mai i ou aiga uma lava, aemaise si ou grandpa Moemalo Gauta, faapea tuaa o si ou tamā le Afioga Sala & Fololina Pesamino mai Leauvaa i Samoa. Alofaaga faapitoa mai ia Aunty Fono Hana Moemalo, ae faasilisili nai ou mātua, si ou tina pele ia Malaefono Moemalo-Pita o Lufilufi ma Lalomanu, faapea si ou tamā ia Sala Pita o Leauvaa. Sky is the limit Sili.
God bless!
