O lenei vaitau o le lolofi mai o tomai o fesootaiga televavave faaonapo nei, ua manaomia ai foi le toatele o tagata i Samoa e iai tomai faapitoa i masini computers ma o le toatele lava sa mafai ona ausia ia tomai ona o aoaoga i atunuu mamao.
Peitai o se fesootaiga i le va o le Malo o Amerika ma le Malo o Samoa ua faaauala mai i faiaoga ua o latou faatino polokalame mo inisinia i lea tomai ua vaaia ai i tausaga uma le faauuina o alii ma tamaitai i tomai eseese o le faaaogāina ma le toe faaleleia o masini computers i le Iunivesite Aoao o Samoa.
O le faaiuga la o le vaiaso, e to‘a 57 alii ma tamaitai na faauuina i le polokalame Amerika lea e ta‘ua o le SISCO ua mafai ona o latou iloa le faatinoga o galuega faamasini computers e lē gata i polokalame ae o le toe faaleleia o ia masini pe a faalaeagaina.
O se vasega toatele ma e tolu laasaga o le polokalame lenei na aoaoina ai i latou ua faapea ona faauuina. O le afioga i le Tapaau o le NUS, le afioga Leapai Lau Dr Asofou Soo na fofogaina le lauga o le faauuga lenei ma faafetai ai i latou ua faaeaina i lenei laasaga i le onosai ma le tinou e taumafai auā e lē o se aoaoga faigofie pe taugofie foi.
Ta‘ua e Leapai le toatele na faamaamulu ma ua lē mafai ona faauma le aoaoga ae o i latou nei ua mafai ona faaiu le aoaoga o se laasaga maoa‘e auā o galuega ua moomia ai nei tomai o loo vaaia le faaopoopo pea.
Ua leai se ofisa e lē o toe faaaogāina ni computers auā le faatinoga o a latou galuega ma e lē gata i Samoa le manaoga o nei tomai ae faapea foi i atunuu mamao; ma ua tatala ai faitotoa mo i latou ua faauuina ina ia faigofie ona saili galuega i le taimi nei poo le lumanai foi.
O le toatele o le aufaauu ua iai galuega ua galulue ai ae o loo iai lava ma nisi o le a agai nei e saili galuega i ofisa eseese o le malo ma kamupani faapea faalapotopotoga tuma‘oti.
