Fai mai se tasi o alii faauu o lenei sauniga tele, “…Ana ou le agai i le aoga faa faife’au lenei ou te leiloa le Atua,” o le saunoaga lea a le susuga George Latu lea o loo galue o se loia faatasi ma lona faletua i le la ofisa loia o Latu Law Firm i Apia.
E le na o ia na faia lea faamatalaga ina ua faatalanoaina i le ausia ai o lenei laasaga taua o le ola kerisiano ma le sailiili i le Atua. O George Latu ma nisi o le mamalu o le atunuu na faauuina i le Harvest Center o nisi ia o sui o le tausaga tolu o lenei aoga faa faifeau lea ua valaaulia ai soo se tasi ua iai le manatu e fia su’esu’e atili i le Tusi Paia ma le finagalo o le Atua.
E tele aulotu kerisikano ua tuua talaiga sa iai muamua ae ua agai mo suesuega aemaise o le avea ai ma sui o le Ekalesia Faapotopotoga a le Atua i Samoa, lea ua iai le aoga lenei.
E to’aiva i latou na faapea ona faauuina ua mae’a taumafaiga i lenei aoga faafaife’au ma ole faamoemoe o le agai atu o i latou nei e faatino aoaoga na fitaituga ai e ala i le ola tala’i ma o se galuge na ta’ua e le faafeagaiga na faatautaia le sauniga o le faauuga, le susuga Pastor Amosa e tatau ona ave iai le faamuamua, le auauna mo le Atua ma lana talalelei.
O le Alii Palemia na valaaulia e le Harvest Centre ina ia avea ma sui o le Malo e momoli le faamalo male faafetai i nei alii ma tamaitai ua faauuina ma toe faamanatu iai le fesootaiga o taitaiga faa le tatalalelei ma taitaiga i isi auaunaga ua tofia ai e le Atua mo i latou na tau’ave nei aoaoga ae o loo galulue i isi tofiga ua valaauina ai.
Ua tai tutusa le matau atu i aoaoga nei ma aoga faa faifeau ua faapea ona faatino i le A’oga Tusi Paia o le Rhema lea e i Taufusi. O se aoga ua filifili ai soo se tasi, e aoaoina ai ma ua ese mai i Kolisi Faafaifeau e pei o Malua, Moamoa ma Piula ia e mae’a loa ona saili loa lea i faife’au faauu nei nuu e agai iai mo le faalautele o le galuega a le Atua.
O le aoga lenei ua vaaia ai tamaitai ma alii ua tutusa lelei lava lo latou tulai mai i le sailiga o le Tusi Paia ma o le mae’a o a latou taumafaiga ua mafai ona tausinuu ae ua mafai foi ona galulue lava i a latou galuega ua faapea ona tofia ai i ofisa ma isi tautua.
Na faatumulia le Harvest Center ona o le fia molimauina e aiga ma uo o lenei aso tele ua laasia e nei foi sui o le atunuu.
E to’a 25 i latou na faauuina i lenei sauniga taua.
