Faaulufaleina le Ekalesia Faapotopotoga Lalor Park – Blacktown Ausetalia

O le susuga ia Rev. Asi Ioelu Luaei Siaoloa, le taitai fono a Melepone Vitoria o le Ekalesia Faapotopotoga a Ausetalia ma Aotearoa Niu Sila, sa ia taitaia le sauniga taualoa i le Aso Sa, 22 o Mati 2009 i le malumalu o St. Andrew i Balmain. O lenei sauniga mamalu o le talia aloaiaina lea o le Ekalesia Faapotopotoga mai le nuu o Lalor Park, i le itu i matu o Sini i Sisifo. O le ofi mai o lenei aulotu i totonu o le Ekalesia Aoao a Ausetalia ma Niu Sila, o se auala lea e iloa ai le faatuputupulaia pea o le galuega talai i o tatou tagata Samoa lava latou i totonu o lenei atunuu tele.
O le laugaina o le upu faamafanafana, na feagai ma le susuga ia Dr. Harry Melkonian. O le tatalo faafetai, o faatoesega, ma le tuuina atu o manaoga, na feagai ma le susuga ia Rev. Ioelu Ioelu, o le taitaifono o le Ekalesia Faapotopotoga mai Aotearoa Niu Sila. O le faitauina o le Tusi Paia sa fofogaina e Suifua Niuapu, o le failautusi a le matagaluega a Niu Sila. O le talisuaga i le Sakarameta o le faamanatuga sa taitaia e Rev. Aloese Filipaina, le taitaifono aoao a le Ekalesia Faapotopotoga a Ausetalia ma Niu Sila.
I le sauniga taualoa o le faaulufaleina mai o le ekalesia i Lalor Park-Blacktown i totonu o le ekalesia Aoao mo ana galuegafai, na molimauina ai e le vaega o talafou le lagolagoina e nisi o le auuso malaga mamao mai i Niu Sila ma isi setete o le atunuu nei, e ala i lo latou lagiina o pesega ma viiga o le Atua e le aufaipese mai Melepone i Vitoria. Sa mafai ona auai le afioga ia Peseta John Nickel, o se tasi o tamalii ua loa lana tautua ia Samoa e ala i le kamupani vaalele a le Polenisia Samoa, le PolyBlue faatasi ai ma le Air Pacific e pei ona galue ai nei.
O le susuga ia Rev. Aloese Filipaina, o se lupe faalele mai le afioaga o Vailuutai ma Faleatiu, faapea lona faletua ia Arieta mai le alalafaga o Fasitoo-Uta, o taitai ma matua faaleagaga ia o le foafoaina mai o lenei Ekalesia i totonu o Ausetalia i le itupa o Samoa. O le faafoeina o le lotu i ona tulaga tau i sauniga ma tapuaiga, e uso tuofe ai ma le faatinoina o sauniga a le Ekalesia Faapotopotoga Kerisiano i Samoa, ma o pese ma viiga lava o le Atua a le EFKS lea o loo faaaogaina mo tapuaina i le Atua soifua. O loo tausia pea ma vaaia e le susuga ia Filipaina ma lona faletua le ekalesia fou lenei, seia maua se latou faifeau e tausia le galuega i le lumanai.