Faaulufale, Tofā Pa‘u Tafaogalupe Mulitalo i le Faamasinoga Maualuga Aukilani

E to‘a 27 sa faaulufaleina i le Falefaamasino Maualuga i Aukilani i le Aso Faraile, 4 o Aperila 2014, ae filo ai ma le matai Samoa mai afioaga o Samatau, Saluafata, Vaiala ma Suimu, le Tofā Pa‘u Tafaogalupe Mulitalo. Na auai atu i ai nisi o lona aiga o ana uo ma ē masani faapea le tamaitai loia ia Iuni Sapolu e molimau lenei faauuga matagofie.

 
O le sauniga lea na faamautuina ai faaletulafono le poloaiga (Order) e mafai ai ona galulue faaloia i latou uma nei i totonu o falefaamasino i Niu Sila nei e aofia ai fale faamasino faaitumalo (District Court) Faamasinoga Maualuga (High Court) Faamasinoga o Apili (Court of Appeal) ma le Faamasinoga Puleaoao (Supreme Court) auā mataupu e aafia ai le tulafono ma tagata soifua, o pisinisi, o ekalesia, o faalapotopotoga ma isi mataupu i Aukilani ma soo se vaega o Niu Sila nei. O le saunoaga a le tofa ia Pa‘u ua leva ona fia oo i lea faalagamaea i totonu o falefaamasino e finau mo tagata Samoa e fia maua se fesoasoani, ae sa tuu atu i le Atua poo le ā sona finagalo, poo sona tofi lea pe leai. O lona faanaunautaiga ia avea lenei tofi ma meafaigaluega auā tagata Samoa i Aukilani ma Niu Sila nei.

 
O le tofa ia Pa‘u Tafaogalupe Mulitalo o le Samoa muamua lea na faauu mai i le Iunivesite faaloia (Auckland University of Technology Law School) i le tausaga 2013. Na faavaeina lenei Iunivesite i le 2009 a o Pa‘u faatoa resitala i totonu o le aoga faaloia i le tausaga 2010.  E fā (4) tausaga le umi o le polokalame faaloia i totonu o le Iunivesite ae tolu tausaga lea na tulimomo‘e ai e Pa‘u lona faailoga faaloia ma faauma ai i le tausaga 2012 ma faauu ai loa i le 2013.

 
O le molimau a lenei tamalii o le atunuu, afai ae faitau se tasi i lana tautinoga, o lona faanaunautaiga ia avea o se faamalosiau i se tagata Samoa o loo pulunauanau i le fia taumafai poo le ā lava se laasaga o loo iai lona fia tausinio mo se mea lelei ma se suiga fou o loo iai lona soifuaga. O le 50 o tausaga o Pa‘u faatoa ulufale ai e ave lana faaloia, ae na uma i le 52 ma faaulufale nei ua 53 tausaga o lona soifua. O lana molimau tusa poo le ā lou matua ua e iai, e te mafaia soo se mea pe a tuu i ai lou loto ma lou mafaufau atoa ma lou faatuatua i le Atua.

 
O le sueina o le auro e lē faigofie, poo le fia maua o se mea matagofie ma se mea lelei e lē maua ma se filemu, e lē gata i le faigata i le tulaga i mea tau seleni i le faatinoina o le aoga, a o galuega sa feagai ma ia, o ona tiute faamatua ma aiga ma le tele o isi lu ‘i na la fetaiai ae lei faavaivai ai lona fia taumafai pea. E 14 tausaga sa galue faafaiaoga ai lenei alo o le atunuu (Lecturer) i le Iunivesite i Massey i Aukilani i mataupu faa socialwork. E tele foi tausaga sa galue ai i le ofisa ulu a le matagaluega e pulea falepuipui ma le ofisa nofo vaavaaia (Ministry of Justice) i Ueligitone faapea ma le ofisaulu (Head Office) a le State Services Commission e pulea galuega a le malo i Niu Sila nei. E fā tausaga na avea ai ma Probation Officer i le itu i Saute o Aukilani.

 
O nei mea uma faatasi ai ma le tomai i le soifuaga nei, e aogā uma lava i le tofi faaloia atoa ai ma le faaaogāina o le gagana Samoa ia avea foi lona tofi ma mea faigaluega e maua ai ni agaga mo le Atua mo lona malo. O Pa‘u Tafaogalupe Mulitalo ua avea nei ma loia i le kamupani loia a Neilson Lawyers i Onehunga i Aukilani.

Sa auai atu nisi o lona aiga, uo ma ē masani e molimauina le faaulufaleina o le alii loia Faatasi ma Barrister Edwin Telle, mai le ofisa loia Neilson Lawyers i Onehunga, sa faaulufaleina Pa‘u i totonu o le Saofaiga o Loia a Niu Sila Le alii loia, Tofā Pa‘u Tafaogalupe Mulitalo ma le alii faamasino na faatautaia le sauniga, Justice Simon Moore o le Faamasinoga Maualuga i Aukilani