I le mae‘a ai o le latalata i le lua o tausaga, o lea ua faafetaia e le aulotu o le Penetekoso i Vaitele le tino mai o lana galuega – o le malumalu tapuai a le Ekalesia.
O se galuega na umi se taimi o tau faauma ona o le utiuti lava o le seleni peitai o le faafetai tele lea a le faafeagaiga ma le aulotu o le alofagia lava o i latou ua mae‘a ai.
E na o loimata lava na faafeiloai ai le mamalu o le auvalaaulia, o aiga ma uo aemaise o sui o le Ekalesia na auai atu i Vaitele auā le sauniga e faaulufale ai lenei malumalu.
O se Ekalesia lenei e lē oo i le to‘a 10 ona matafale peitai ua vaaia le fai mea mafai, le loto tapuai ma le tauivi mo le talalelei, e ala i le tau faasoa ma le finau ina ia mae‘a le malumalu tapuai mo aiga o loo aofia ai i lenei aulotu laitiiti. O le Ekalesia o le Alofa Tunoa Penetekoso na faavae mai i Vaimoso i le tausaga e 1995 ma o le tausaga e 2005 na see mai ai i le nofoaga fou i Vaitele ma o lea ua faamautu ai lava.
O lenei falesa ma lona faatinoga na tagi lava i lima le Ekalesia e pei ona ta‘ua e le susuga i le faafeagaiga ia Fasio Aukuso.
E $90,800 le aofai o le seleni na saili e le Ekalesia e ala ia latou sailiga tupe ma o le tele o nisi totoga o le malumalu na faimeaalofa mai ai sui o le Ekalesia.
O lenei malumalu e iai ona ea malulu ma ua mae‘a fausia foi i le fausaga e malu ai sui o le aulotu ma le faamoemoe o le a fai lea ma fale e unai ai le loto tapuai ma le fia auauna o tamafanau a le aulotu e agai e faaauau le galuega tala‘i.
E 10 aiga o loo i totonu o le aulotu ae e iai lava taimi e na o le fitu e faaauaua le agai atu i le falesa ma o le faamoemoe foi lea o le galuega ina ia unai ai le agai atu o tagata i lea malumalu mo tapuaiga.
