O se faamoemoe ua taunuu, o le laau lea o le soifua. O se faalepo sa tulimataia mai aso ua sola, ua taunuu ma le manuia ae o se galuega foi sa tuu pea i talosaga i aso faipea, ua iu ma le manuia ma ua maualuga ai le viiga o le matai i le lagi i lana tausiga alofa i le soifua ae tainane le ola galulue o sui o le Ekalesia Faapotopotoga Iesu i Samoa i New Lynn.
O aso e taupoina ma talotalo ia taunuu manuia, o aso e le faigofie o le tapuaiga a matafale e fia o le ekalesia o loo ua soosoo tauau ma punouai mo se manuia o le galuega a le Atua i lea foi pitonuu o Niu Sila.
O se aso e tumu i le faafetai ma le faagaeetia, ae sili ai o se aso ua maualuga ai le viiga o le Matai sili i le lagi ina ua mae‘a le galuega sa feagai ai ma le agaiotupu ma le aiga Salemalama ae tainane le tapuaiga i le aufaigaluega paia a le Atua ma aigalotu uma o le ekalesia, ma le fai tatalo i le matagaluega e le gata i Aukilani a o Ueligitone faapea aiga, uo ma e masani.
O le itula e sefulu i le taeao o le Aso Toonai na tea nei na muai tatala ai faitotoa o le lotoa lenei i New Lynn ma faaulufale le mamalu o le atunuu i le malumalu o le ekalesia ua mae‘a nei ona fausia.
O le tina o Fetuna Atiga na ootiina le lipine o le faitotoa o le lotoa o le ekalesia ae o le tina o le matagaluega, Luisa Tuisaula sa ootiina le lipine o le malumalu fou ua mae‘a. O le susuga i le faafeagaiga o Maliumai Atiga ua maliu, o ia lea sa leoina le lafu mamoe i New Lynn ae lei tuumalo i le amataga o le tausaga nei. E ui i lea o loo faaauau pea le galuega e le tina, Fetuna ma le fesoasoani a le susuga Fuifui (faifeau nofoaiga) ma nisi o le aufaigaluega.
O le tala o le galuega sa feagai ai ma le tofa Seuamuli, o le fofoga foi lea o le ekalesia i New Lynn sa ia ta‘ua o le masina o Novema o le 2008 na maua aloaia ai le pemita e faatino ai le galuega o le malumalu ma e lei faigofie ona sa iai foi nai faafitauli sa feagai ma le ekalesia i le tau amatamata mai o le galuega ma le tele o mea e ao ona faamautuina lelei mo le sologa lelei o le galuega.
O le isi maota o le ekalesia o loo sosoo ane lava ma le falesa sa tuuina ane i ai e le au kamuta le tau e $88 afe e tatau ona toe faaleleia ai lea maota.
Sa tagiilima lava le tele o gaioiga sa faia mo le faaauauina o le galuega. Saunoa Seuamuli afai ae aofai le tinoitupe na alu i le tau atoa o le galuega ma tupe na totogi ai ua oo atu i le fa selau ma le tasi afe tala Niu Sila mo galuega uma e lua, togitogi lava e le Ekalesia.
E pei lava foi o le tele o faamoemoe, e fita lava le ala na asa peitai ua iu ma le manuia ma ua taunuu le faamoemoe sa taumafaia pea.
O le mea moni e toatele nisi sa faailoa le ofo i le seleni sa faatinoina ai ia galuega e lua pe a fua atu i tau o isi galuega faapea peitai na saunoa Seuamuli ma faafetaia foi le galuega lelei sa feagai ai ma le kamupani kamuta sa nafa ma le galuega.
O le tulaga o le seleni o loo totoe o le galuega o loo togitogi e matafale e 13 o le ekalesia. O le faaulufalega lava ia i le Aso Toonai na mae‘a loa le sauniga o le faapaiaga i le malumalu fou, sosoo ai loa ma le taumafataga tele sa faia i le faleaiga o le Manhattan i Mt Roskill.
O faaaloaloga foi e pei ona masani ai le atunuu i aso faapenei sa faatino ai i lea maota, maitauina e le Samoa Times le oloa luuluu o le faamoemoe e le gata i palapala a malo aemaise foi o tulaga masani i taumafataga mo le au valaaulia a o foemalie lava le aso e le tootoo o le ekalesia, tofa Seuamuli. O le aofai o le maau ma le aao foai o le au valaaulia ma ekalesia na aofia ai i le faamoemoe ua mautinoa e silia ma le lima sefulu afe tala Niu Sila.
O finagalo faaalia o le toatele na auai sa muai ave lava le faafetai ma sula le alofa o le Atua i le faamoemoe ua taunuu, ma ave foi le faamalo i le ekalesia i New Lynn i ona tulaga tofi uma ma le lautele o le ekalesia e tusa ma le galuega maeaea.
O le sauniga i le Manhattan na faaiu foi mea uma i le faafoi o le viiga i le Atua ma saunia ai e le susuga i le toeaina ia Mose Tuisaula le tatalo faaiu ma pepese fiafia ai i le viiga ‘Lo ta nuu’ ma taape ai le fuamanusina.
