O le faamanatu ai o le atoaga o le 20 o tausaga talu ona faavae le lotu lenei i Samoa ua fausia ai ma sona malumalu fou e pei ona molimauina i le nofoaga tutotonu o lea ekalesia i Samoa i le afioaga o Vaitele.
O se galuega na molimau sui o le Ekalesia na faia ma le faatuatua e faia e le Atua vavega i galuega faapenei.
O le mau e lenei Ekalesia e lē fia tapuai le Atua i se malumalu e aitalafu lona fausiaina, ma o le ala lea na saotupe uma ai Samoa nei, Niu Sila ma Ausetalia ina ia amo faatasi le avega e māmā ai.
O le tau atoa o lenei galuega e $408,000 tala Samoa. O se sao lea mai i lala o le ekalesia i Samoa nei, o Niu Sila faapea ai ma Ausetalia.
Na faafetaia e le Ekalesia nisi o kamupani na mafai ona fesoasoani atu i le fausia o lenei malumalu tapuai. Ma o le nofoaga autu lenei o le Ekalesia e i Vaitele e faatautaia ai foi ana fonotaga, mafutaga ma faamoemoe patino lava i le Ekalesia.
O nisi o vaega o le falesa sa faameaalofa e nisi o le aufaigaluega a le Ekalesia, ma o lenei Ekalesia na faavae mai i le tausga e 1995. O le tausaga lenei ua atoa i ai le 20 tausaga talu lona tulai mai i Samoa.
Faaalia e le tina o le galuega na tatala aloaia foi lenei malumalu, o Tafuamase‘afa Olita Faualo, e malosi lava lona talitonuga o le galuega lenei na mafai ona tino mai ona ua tuu atu i le Atua le latou taumafaiga, ma o le faatuatuaga lea ua tino mai ai le malumalu fou.
Mo le faafeagaiga lava ia ma le faletua, o lea na foai le silia i le $100,000 tala Samoa i le galuega tele. O le faamalo ma le faafetai na momoli e le susuga ia Pastor Viliamu Mafoe ma na ia faamamafa ai i lana saunoaga autu le tāua o le fau o se galuega i luga o le papa ma o le feau tāua lea na ia faaalia ua tino mai i le galuega a Vaitele.
