Faaulufale le malumalu EFKS Aleisa i Sasa‘e

E na o le toaono lava matafale, e toatasi e nofo i Niu Sila ae o le isi toalima e i Samoa, ae e lei faavaivai le asamo solo mo se malumalu o le Atua, ma o le faaiuga o le vaiaso na tea nei na molimau ai le atunuu aemaise le Ekalesia Faapotopotoga Kerisiano Samoa i le galuega ua tino mai a le afioaga o Aleisa i Sasa‘e. O se galuega na fausia e se konekarate mai Saina ua faamautu i Samoa e saili galuega ai e faaigoaina o le Zhen Construction, ma na aofia i lea galuega le Malumalu – le Satauro o le Manumalo ma le Maota o le Galuega le Hall.

 
Na auai faatasi taitai o le Ekalesia, le Pulega a Aleisa atoa ai sui o le afioaga, sui o le Malo ma sui o le konekarate kamuta aemaise le auvalaaulia i le faaulufalega o lenei galuega. O le tausaga na tea nei lea na amata saili ai le aulotu, ma na muai tapa i le EFKS mo se fesoasoani ma maua mai ai se tinoitupe e $80,000 (tala Samoa). “Ae e lē lava ai se falesa i se $80,000 tala, ma o lea na matou fono ai ma tonu ai loa e saili i Ausetalia se fesoasoani,” o le saunoaga lea a le Faafeagaiga o le EFKS Aleisa, Rev. Apisaloma Ta‘eleipu. O le malaga lea na tulai mai ai ni faafitauli ina ua alia‘e tuua‘iga o le leiloa o le tinoitupe e $10,000 (tala Ausetalia) ma tuua‘ia ai le teutupe o le aulotu.

 
Na oo i le faamasinoga le mataupu ona o le lē fiafia o le teutupe lea na faapea mai o le faafeagaiga lava ma lona alo teine na umia le tupe i le taimi atoa o le sailiga tupe ina ua uma ona faitau. Na agai ese ai nisi o sui o le aulotu sa iai ae na faaauau lava le galuega. E lē o mailoa nei poo faaauau lava le mataupu lenei i luma o le faamasinoga ona o lea ua ta‘ua e sui o le aulotu ua agai ese, o lea sa iai le fuafuaga e faalelei le aulotu ma toe foi e galulue mo le Atua na mafua ai ona faatu le aulotu ae lē mo tagata.

 
O le auga foi lea o saunoaga o le aso ina ua tatala le galuega. O le Atua e foi i ai le viiga, o le galuega na fai mo Ia ae lē o le tagata. Saunoa foi le alii faifeau, o le uiga foi lea o le fuaitau o loo i luma o le malumalu lenei, “Satauro o le Manumalo” ona o le Atua lava e manumalo ae lē o le tagata. Faaalia e le faafeagaiga, a talanoa loa i le Satauro o le faailoga o faigata ia na feagai nei ma le aulotu ma e ui i faigata ma puapuaga, ae na ta‘ua e le susuga Apisaloma, o lea ua manumalo lava le Atua.

 
O le Taitaifono o le EFKS, le susuga i le faifeau toeaina faatonu, Susuga Rev. Elder Tavita Roma, o ia na fai ma sui o le ekalesia e momoli le faamalo ma le faafetai i le susuga i le faafeagaiga atoa ai le aulotu o totoe nei i le finau ina ia mae‘a le galuega. Faaalia e le Taitaifono, ua manino uma lava le ekalesia i le tulai mai o faafitauli mai i le amataga o le galuega seia oo lava i le mae‘a ai, ae o le faafetai o lea ua tino mai le galuega a le Atua – o ia ua fai uma ai nei auaunaga. E ese mai i le $80,000 (tala Samoa) na ave muamua e le ekalesia mo le amataga o le galuega, o le meaalofa a le ekalesia i le mae‘a ai o lenei galuega e $30,000 (tala Samoa).

 
O le konekarate Saina o le Zheng Construction na feagai ma le galuega lenei ma na faafetaia e le aulotu lea konekarate ona e ui na iai le pa‘ū i le tauofoga i lenei galuega, ae na tele lava faaopoopoga o le malumalu na faatino e lenei aufaigaluega ma sa iai foi le taitai o lenei galuega i le sauniga e tatala aloaia ai. O le tupe na maua i valaaulia o le aso na mafai ona totogi faauma ai le pili a le konekarate na totoe. O le isi tupe na faaatoa ai le tau o le malumalu atoa ai ma le maota o le galuega na maua mai i sailigatupe a le aulotu lea na masii ai i Ausetalia, ma o le faafetai na faaleo e le faafeagaiga na agai i aiga ma uo a le aulotu na agai ane i le tusigaigoa na faia i Sini Ausetalia lea na maua ai le tau mulimuli o le galuega.

 
O le faafetai foi na agai i faifeau toeaina o Sini i Ausetalia ona o le lagolago na faaali i lea taumafaiga. O le kamupani fai auala o Ulia Construction na faafetaia ona o le telē o le galuega i le suaina o le fanua ma le la‘u mai o le maamaa e tanu ai na tele lava ina fai fua. E lē gata i lea o isi sui o le aulotu ma o latou aiga na velo ‘aso uma lava i lenei galuega. Faaalia e le alii faifeau o loo fuafua foi isi galuega i le lumanai e pei o se fale mo le faafeagaiga ma lona aiga auā o le taimi lenei ua nonofo i le faasee o le maota o le galuega, ae o le faafetai ona o lea ua mae‘a le faamoemoe na moemiti i ai le aulotu i lea itu o Aleisa.

 
O le feau o le aso, ave le viiga i le Atua, o ia na mafai ai nei taumafaiga uma ma o ia lava na taulai i ai le galuega ae lē o le tagata. O le tau atoa o le galuega e $252,000 tala ma ua tuufaatasi ai le tau o le malumalu atoa ai ma le maota o le galuega.

Faifeau toeaina Pulega Aleisa, Rev. Elder Tavita Anesone i le uluai faamanatuga i le malumalu fou Le Malumalu tapuai fou o EFKS Aleisa i Sasa‘e