O se alo o Samoa, le alii o Ioane Jr Tuupo, na aloaia i le Aso Faraile talu ai, aso 5 Tesema 2014, lona ulufale atu i le Saofaiga a Loia (Admission to the Bar High Court Auckland) i le Faamasinoga Maualuga i Aukilani.
Sa faauuina mai Ioane Jr Tuupo i le Waikato University i le tausaga nei lava i le aso 15 Aperila, 2014 ma ona faailoga Degree o le Bachelor of Law ma le Bachelor of Arts mo le 3 ma le ‘afa tausaga sa taumafai ai.
Na faimalaga mai lava nai ona mātua mai Ausetalia, le susuga Ioane ma Maria Tuupo ma nisi o le fanau i lona faauuga poo lana tautoga. O lona tina o le alo o Dr. Magele Sione Palamo ma Lalomalava mai Vaimoso, Faleapuna ma Vailoa Palauli. O lona tamā o le alo o Rev. Tuupo ma Kueni Tuupo Lesatele mai Neiafu, Sasina, Falelima ma Sataua faapea ma Gataivai i Savaii.
E faauu nei le alii o Ioane Jr. Tuupo e avea ma Loia, ua atoa ai foi ma le 21 o ona tausaga. Ua suafa matai ia Moti mai Neiafu i le tausaga 2008. O ia foi o se faipese/tapiano o le Ekalesia Metotisi Samoa i Logan City i Ausetalia. O lona faamoemoe ia aogā o ia mo le atunuu faapea le Ekalesia pele i lona agaga, le Ekalesia Metotisi Samoa.
