Malumalu ole Ekalesia Metotisi i Maugalaki i Mount Roskill

Malumalu ole Ekalesia Metotisi i Maugalaki i Mount Roskill

E mafaia mea uma ile faatuatua, ua tele le alofa ole Atua e faaalia i feau ma galuega a lana fanau ma le ekalesia. Ia faamalolosi ile atina’eina ole tino o Keriso.

Ole saunoaga lea ale afioga ile Peresetene aoao ole Ekalesia Metotisi Samoa Rev Apineru Lafai na ia faafetaia ai le galuega fita sa tauasa ma fita mai iai le susuga ile faafeagaiga ia Rev Fogalele Iosia ma le faletua faapea le matagaluega malosi mai Maugalaki, ile fausia lea ole malumalu tapuai ole Atua faatasi ai ma le hall ale matagaluega.

Ole afioga ile Peresetene sa ia ta’ita’iina le sauniga lotu ma o lana faamalosiau lea sa lima ta’ita’iina ai le soifua galulue ma le soifua auauna ole fanau ale Atua.

Toatele auaiga uo ma e masani, faapea sinoti e lua i Aukilani sa latou patipatia faatasi le lelei ole Atua i totonu ole matagaluega i Maugalaki, ina ua tini lau ole faamoemoe.

Ooti le lipine Malumalu ole Ekalesia Metotisi i Maugalaki

Ooti le lipine Malumalu ole Ekalesia Metotisi i Maugalaki

Sa faapea foi ona auai mai iai nisi o susuga i faafeagaiga mai Ueligitone ma Invercargill faapea tau aiga e molimauina faatasi le aso fiafia ole ekalesia. O lupe sa vao eseese a ua fuifui faatasi ile fusi afu e tasi ona ole galuega sa tapuia ma nofo tatalo uma iai matagaluega aemaise o aiga lotu a’o lenei ua iu ma le manuia.

Ole afioga ile faletua ole failautusi aoao ole ekalesia ia Fialelei Leti sa ia ootiina le lipine ma tuuina aloaia atu loa ki ole malumalu ele tufuga ile afioga ile Peresetene aoao ia Rev Apineru Lafai aua le faaulufaleina aloia ole galuega fou ale Atua.

Na malie pesega o viiga ole Atua e pei ona lagiina ele ekalesia Metotisi mai Grey Lynn, ekalesia Metotisi Te Ata Tu, faapea ai ma le ekalesia Metotisi i Otara ma ua fai lea ma sao o tagata uma e alagaina ai le viiga ole Atua ona o mea sili ua ia faailoa i lana fanau.

Ole afioga ile matua taulagi ia Taito Malotau Sue sa fai ma fofoga ole ekalesia e faasoasoaina polokalame ole aso ina ua maea le sauniga.

Na sosoo ma le taumafagataga na tapenaina ele matagaluega i Maugalaki ona faagasolo loa le o faaaloaloga e pei ona masani ai aso faapenei.

Ole fofoga lava ole aso sa tu tootoo ile faamoemoe, a’o le afioga ile sea mai Upolu i Sasae ia Rev Iosefatu Semi na fai ma sui ole auvalaaulia ma le aufaigaluega ale Atua e molimoliina le faafetai ile matagaluega a Maugalaki e tusa ai ma faaaloaloga.

Ole tau atoa ole galuega ile malumalu ma le hall e tasi le miliona ma le luasefulu fitu afe tala, ae lei tau aofai ai le tele o vaega ole galuega sa ofoina ma agalelei ai aiga lotu, faapea nisi o vaega ole fale sa fesoasoani iai le mafutaga a tina poo le auso fealaofani, a tuu aofai la iai ma nei galuega tau ofo a aiga lolotu ole ekalesia ona sisii atu loa lea i luga ile tasi le miliona ma le lua selau afe tala, le tau aofai.

Ole aso 6 o Mati ile tausaga ua mavae 2017 na amataina ai le galuega, ele susuga ile faafeagaiga ia Rev Misionare Tuitamai ma lona faletua, ae peitai na siitia ia Aukuso ile tausaga ua mavae ina ua mae’a le lauina ole tusi tofiga, ma seei mai loa le susuga ile faafeagaiga ia Rev Fogalele Iosia ma le faletua ia Ruth Elepa Iosia ma faaauauina le galuega seia faaulufale ile aso 17 o Mati ile tausaga nei 2018.

E 13 matafale galulue ole ekalesia ma sa tagi lava i lima sailiga seleni aua le galuega, e ala lea ile galulue faatasi o itu tino uma ole ekalesia, mafutaga tamā, auso fealofani, autalavou Aoga Aso Sa, ma le aufaipese, ile faatinoina ole atina’e.

E $570,000.00 le aitalafu ale ekalesia oloo iai, ae ole lima foai ma le alofa tulai o matagaluega ma aiga sa maua ile Aso Toonai ile faaulufaleina ole malumalu ma le hall e $196,000.00. Ma o lenei seleni o lea tuuina atu loa ile aitalafu, a’o le isi vaega oloo totoe ai o le a galulue ai loa le ekalesia e faifai malie sailiga tupe e faamaea ai.

Faailoa le agaga faafetai ole susuga ile tausi matagaluega ia Rev Fogalele Iosia ile alofa ole Atua, ile galulue ma le onosai ma faatalitali ia te ia. E leai se isi e tele sona tamaoaiga, ae mafaia mea uma ile alofa ole Atua.

E tumau ai le faatauvaa ile tagata ae tumau le viiga ile Atua. Momoli foi lona agaga faafetai i aiga lotu uma ole ekalesia i Maugalaki ona ole galulue punouai ma le onosai ua taunuu ai ma le manuia le faamoemoe.

Comments

comments