Ua lē nofo lelei pea finagalo o Alii ma Faipule o Lufilufi i le mataupu ua lagomia ai lagona i le va faalotoifale ma le tama-aiga le afioga i le Tui Atua Tupua Tamasese Efi, o le Ao o le Malo.
O lana faaiuga e tafiesea le tama-aiga ma lona aiga ua lē o toe lotelotea ae ua faamausalī pea, atonu seia iai se taimi ma se aso e toe totogo ai ni lagona fou.
O le agiga i fesootaiga ma faasalalauga televavave o se talosaga a le Tui Atua i le Palemia e faia se Komisi Suesue e silasila i tuuaiga a Lufilufi faasaga ia te ia, o se pese leotele i lagona o Lufilufi ma sa nofo sauni ai foi e tuuina atu lo latou finagalo i se komisi o le a filifilia.
Peitai ua toe faasee tuagalu se finagalo o le Tui Atua na momoli muamua i le taitai o le Malo ma lana taupulega mo le faia o se Komisi Suesue e pei ona toe suia sona lagona, i le taatia loa o lea fuafuaga. Na valaau e le Ao o le Malo le au tusitala ma ia faailoa ai lona manao na ave i le Palemia susuga Tuilaepa L Sailele Malielegaoi, i se la feiloaiga.
Ae ina ua toe iai le suiga i lona finagalo, e lei toe valaauina tusitala e lana afioga e oo atu mo le faalauiloaina o le taofiga o lana talosaga mo se Komisi Suesue, ae ua feiloai ma le Palemia i le taeao o le Aso Gafua na tea nei 30 o Aukuso 2010 ma folasia ai sona lagona e taofi lea fuafuaga.
E leai ma se mafuaaga e tasi o faaalia i le pepa o faamatalaga na tuuina mai i le ofisa o faasalalauga faalauaitele a le Malo, ua mafua ai ona toe suia le lagona o le tama-aiga. Peitai o loo iai le talitonuga ma le manatu o nisi, pe atonu o le aliali mai i luma o ni faitioga malolosi e ala i lomiga a nusipepa faasaga i lea talosaga mo se Komisi Suesue, le mafuaaga lea o le suiga.
O se itu ua faaalia e le Palemia lona matuā taliaina ma le fiafia auā o i tonu o loo taoto ai le faavae o Samoa, E Faavae i le Atua.
O le amataga o le vaiaso na tea nei na toe fono ai Lufilufi mo le talanoaina o le mataupu, peitai ua lē manuia sailiga ma taumafaiga i se finagalo o alii ma faipule poo ā tonu mataupu sa agai i ai le fonotaga ona ua tapu se isi o le nuu e aofia ai matai, ona toe talanoa i tusitala. Peitai ua faaalia e se matai o Feesago Lopi i se tasi o lipoti, o le taunuuga o lea fonotaga na saga faamautu ai pea le faaiuga faasaga i le Tui Atua ma lona aiga.
Ua iai se molimau faatuatuaina na ta‘ua ai le lokaina o le auala e agai atu i le maota o le Ao Mamalu i Lufilufi, ma e lei toe uia lava e le tama-aiga poo se isi o lona aiga talu ona tu le Tootoo e fofogaina ai le finagalo o le nuu. Peitai ua iai molimau ua ta‘ua ai o le a fausia se isi auala mai se isi vaega o le nuu tuaoi o Saoluafata e alu atu se isi auala taloto e tau atu i le maota i Mulinuu ma Sepolataemo.
O loo maualuga le manatu o le au mātau upu a le atunuu, e iai se taimi e maua ai se laolao ona toe fofo a alamea lea o lenei feteenaiga, ma toe maua ai se nofo lelei o Lufilufi ma le Tui Atua.
