Ua faatusa e le Palemia le taitai o le atunuu Tuilaepa Lupesoliai Sailele Malielegaoi, le fetosoaiga o le va o le pulega o le matagaluega o le Soifua Maloloina, ua pei o se solofanua e lua ulu. O le tali a le taitai o le atunuu, ina ua fesiligia i se faaiuga o le lipoti a e komisi suesue lea na tofia e le Kapeneta e galulue e suesueina le toe tuufaatasia o le matagaluega o le soifua maloloina ma le pulega o auaunaga tau soifua maloloina.
O le toe tuufaatasi ona na mafua mai i le le mafai lea ona ausia o sini faataooto o le faaleleia o le tautua a le matagaluega o le soifua maloloina i soifua lelei o tagata lautele. Saunoa Tuilaepa ua taunuu atu i le Kapeneta le faaiuga o le suesuega a le Komisi, ma ua maea ona faatalanoaina ae ua toe pasi atu nei le lipoti mo se tali a fomai i le mataupu ona toe foi mai lea e faatalanoa i le Kapeneta.
Peitai i le aotelega o le lipoti, e pei ona lomia i le nusipepa o le Observer, o loo manino ai le feteenaiga tele i le va o fomai ma tamaitai tausimai, i upu faafaigofie, o le lē galulue faatasi o fomai ma teinei tausimai pasi. Lea foi na atagia i le saunoaga a le taitai o le atunuu. “O le fefinauga lea o loo manino mai o le faatulagaina o tiute tauave ma tiute faatino i luga o le auivi o le matagaluega.”
O le faataitaiga lelei e pei ona saunoa iai le Palemia, o mataupu o se taotoga o le a fai, lea la ua fai atu le fomai i le teine tausimai pasi, e alu e tapena uma mea e manaomia mo le taotoga. Ua fiu le fomai e tatali, ae sue atu, ua leai se isi, ua taofi ma faatonu e le taitai o tamaitai tausimai pasi e tuu ae alu i Savaii o loo manaomia mai ai o ia.
“Ua lua pule, ua le ese ma se solofanua e lua ulu, e toso atu e le isi le ulu i le isi itu, a’o le la foi e toso atu i le isi i le isi itu ae tuu le mea tāua lea na fai atu e fai.”
“O mea la ia e le le mafai ona laaloa i se vaai a le Kapeneta e tatau lava ona silasila toto’a iai ona e faaono tuua’ia ai foi le Kapeneta pe a laaloa e le silasila iai.” “Lea la ua tulai mai foi le faalavelave ua aafia ai soifua o pepe, aemaise o fanau i le lumanai, e le tatau la ona nofonofo le malo e tatau ona fai iai se gaioiga.”
O Oketopa i le tausaga nei lea na fuafua e tatau ona oo atu iai ua faataunuu le toe tuufaatasia o matagaluega e lua. O loo faaalia le lē fiafia o tamaitai tausimai pasi, i le aveesea lea o latou mai i luga o le auivi fou. E moni lava o loo iloa i le faataotoga o le auivi peitai e lē o manino, ma e foliga mai, o galuega a le au tausimai pasi, o loo momono i isi vaega o le auivi, ae tatau lava ona manino mai le taatia o le faaigoaina o le vaega faapitoa mo tamaitai tausimai pasi.
O le finauga a le pulega a le falemai o loo manino mai, e leai se mea e popole ai fua tamaitai tausimai pasi, o le faiga lea o loo agai iai le auivi fou o se auala e manuia uma ai vaega eseese o le falemai, o se faiga e faafaigofie ai ona maua avanoa e toe unaia ai le tomai ma le atamai e ala i aoaoga i atunuu i fafo e le gata mo tamaitai tausimai pasi ae faapea foi i alii ma tamaitai fomai.
Saunoa Tuilaepa, o le tulai mai o feteenaiga nei, e faaono tuuaia ai la le Kapeneta i le nofonofo ae le faia iai se fofo i faafitauli. “O le mea lea e tāua ai le vaai lelei i tua atu o le faafitauli, pe aisea ua ala ai ona faapea ae o le a foi se fofo.”
Saunoa Tuilaepa o le faamoemoega foi lea o le suesuega o loo alo atu nei iai le komisi lea ua galulue i lona faatinoga, o le toe tagatagai lea, e le toe tatau ona toe faia ni tuiga e tamaitai tausimai pasi, e aunoa ma se fomai.
