O le aofaiga o tama ma teine Samoa ua vaaia le faauuina mai kolisi maualuluga i Sini nei o se lagona faamafanafana loto mo le lumanai pe a faatusa i le gasolo mai Niu Sila ma Samoa o aiga ma a latou fanau talu ona lulu mafuie tetele i Niu Sila i le 2011. E amata atu i pitonuu o Mt Druitt, Bankstown, Liverpool ma Campbelltown e le asa lava se sauniga ma le vaaia ai o ni alo o Samoa e mau faailoga pe taiataiulu foi i nisi o aoga.
I Bankstown i le kolisi a Sir Joseph Banks o loo taitaiulu ai le alii o Sani Anaki Jr na vaaia le tele o faailoga na ia ausia aemaise se tasi o alii talavou ia Semi Jr Lynch i taaloga ma isi faailoga faatuatuaina i le kolisi.
O le alo lea o le Afioga Mano Pesefea Semikueva Lynch ma le faletua ia Foleni. O se tasi o alii faasalalau o loo tautua mai i le FM98.5 le Fofoga Moomia o Samoa.
O le tamaitai foi ia Celeste Tapu Tuaimalefua na maua le faailoga o le ‘Most Improved’ i mataupu tau pisinisi. I le isi pitonuu i Sini i Casula na vaaia ai foi le taulamua o le Tamaitai ia Esther Misa Su‘a le alo Petasi ma Aukuso Su‘a.
O se vaaiga ua maofa ai foi mātua papalagi ma isi atunuu o le alofa faivavale o mātua, uso ma tuafāfine aemaise aiga ma uo i la latou lupe faalele.
E tofu lava le sui o le aiga ma le faasolo ma ulalole ma sukalati faapea foi ula tupe e faaula ai a latou fanau.
O se vaaiga matagofie o le pueata ai o i latou ma a latou fanau ma alo nei o Samoa. O nisi foi papalagi ma atunuu eseese ua faaula atu ai lava.
I le aai o Campbelltown i le aoga Faapitoa (private) a St Gregory’s lea e auina atu ai fanau sikolasipi mai aoga tulagalua a Campbelltown, e na o le toalua alo o Samoa mai le 200 na faauuina o fanau Ausetalia i le Aso Faraile.
O le alii o Moli Kitiona Moli ma Damon Sione Uesele na fanau i Samoa mai Papauta ma Vaivasetai.
O le saunoaga a le tamā ia Kitiona Moli e tusa ma le $2,000 Ausetalia le pili o lona alo i le kuata, ma o se tupe aogā i le ausia o le faauuga.
O le alii o Damon Sione Uesele e lē gata o le siitia mai Ausetalia i le ono o ona tausaga ae na ia maua le sikolasipi a Claymore Public School e aoga fua ai mo tausaga e ono i le Kolisi Faapitoa a St.Gregory’s.
