Faatupuina sauaga pe a faaauau pea le sasa o fanau

Afioga Vui Clarence Nelson Faamasino ole Faamasinoga Maualuga a Samoa

Ua ave se tuualalo ale afioga ile faamasino ole Faamasinoga Maualuga, Vui Clarence Nelson, ina ia faamutaina le sasa pea o fanau auā ole faitotoa lea oloo mafua ai ona faatupulaia sauaga. Ole sasa foi e pei ona faaalia ele faamasino e faatupuina ai pea vevesi ma aafia ai fanau ma tupulaga i solitulafono ole faamimisa.

Ole finagalo o Vui na folasia i lana pepa na faia ile koneferenisi talu ai nei sa saili ai ni auala e fofo ai sauaga i totonu o aiga ma sauaga e fesootai ile faatupu vevesi o tupulaga talavou. Na saunoa le alii faamasino sinia ole faamasinoga maualuga a Samoa i lea faatasiga ma ia ta’ua e faapea o mātua oloo faaaogā pea le sasa e faatonu ma a’oa’i a latou fanau ose vaaiga lea i fanau e faamautu ai io latou lagona ma mafaufau ole sasa ose tasi o vaega ole soifuaga o aso uma.

Ole Matagaluega o Faamasinoga na taulamua ile koneferenisi sa faatupe ele UNPD ose lala o Malo Aufaatasi sa soalaupule ai ni fofo o sauaga i totonu o aiga faapea gaioiga faatupu vevesi ua lofia ai le lotoifale o tupulaga talavou. Ole lua vaiaso ua mavae na toe aliali mai ai ni vevesi na faatupu e nisi o fanau aoga i totonu ole taulaga, ma ua faamautu ai ma le finagalo ole Malo e toe mafai ona faaofi se tulafono e sasa a’oa’i ai fanau. Ua faaalia ele afioga ile Palemia susuga Tuilaepa Sailele Malielegaoi, e iai lava nisi o atunuu oloo faavae a latou pulega ile faatemokarasi oloo faaaogā pea tulafono e faataga ai ona sasa a’oa’i fanau.

O lenei lava mataupu o sauaga sa amata faagasolo ai ile vaiaso ua mavae le polokalame o lenei tausaga ole 16 aso e tetee atu ile sauaina o tina ma tamaitai ma fanau ise feau taua mai le faafeagaiga ole ekalesia faapotopotoga kerisiano Samoa i Lalomanu le susuga Etisone Gafa.

Ile sauinaga lotu na amata ai le polokalame na saunoa ai le faifeau ma ia faailoa ua tatau ona taofia le toe talia ole itupa o alii e umia tofi faipule ole Palemene, faapea le tauaveina ole galuega faafaifeau ae oloo latou sauaina o latou faletua ma tausi.

Ole sauniga e amatalia ai le polokalame ole 16 aso ole tetee atu i sauaga ua taulamua ai le polokalame o tamaitai a Malo Aufaatasi na faia ile afioaga o Lalomanu i Aleipata na folasia ai ele susuga ile faafeagaiga ia Etisone Gafa lea feau mo ekalesia uma ina ia silasila ile tatau ona taofia ai oni tamaloloa e fasi avā ona toe avea ma Faifeau poo se Faipule ole Palemene.

Faaalia ele faifeau i lana lauga o ana sailiiliga na faia na ia maua ai e tusa e to’a sefululima faifeau oloo galulue oloo latou sauaina o latou faletua. Na ia faailoa foi ole 35 pasene o tina ole nuu o Lalomanu oloo tausinuu ai ma lona faletua ma lona aiga oloo sauaina.

Oloo faavae lea faamaumauga ale faifeau ile numera o mataupu e saili atu ia te ia se fesoasoani ona ole va o ulugalii. O sauaga sa faailoa atu ia te ia e mafua ia sauaga ole tagofia ole avamalosi, o fesootaiga faaulugalii, ma sauaga e mafua ona o meaai. Ole lu’i ale susuga Etisone Gafa i tina ma tamaitai ole atunuu ia faailoa sauaga oloo aafia ai ae aua le nofonofo ma lē gagana ile taumafai e natia.