O Ausetalia le isi Malo sili ona matamau pe a oo ina liliu e sasaa mai lona tamaoaiga tau tupe e faaleleia ai atinae eseese mo le manuia o Samoa. O lenei ole a mae‘a foi lenei tausaga ae oloo faaauau pea le agalelei o Ausetalia.
E 2 miliona lima selau afe ua aumai e lea Malo e fausia ai le alalaupapa i Leonē lea ua fā tausaga e lei toe uia e taavale ona na faaleaga lava ele afā o Eveni ia Tesema ole tausaga e 2012, e oo mai ile taimi nei e lei toe faaaogāina lava. O Aperila la ole tausaga fou 2017, e tatau ona toe tatala ai e pei ona faailoa ele tamaitai Minisita ole va i fafo o Ausetalia le sui Palemia foi o lea Malo o Julie Bishop.
Ua faaopoopo iai ma le fausia foi i fesoasoani tupe a lea lava Malo agalelei ma ni alalaupapa se lima e mafai ona faaaogā i taimi e leaga ai le tau aemaise pe a tulai mai ni lologa ma tafega tetele ma faaleagaina ai auala tetele. O alalaupapa ia e pei ona faaalia ele tamaitai Minisita ole va i fafo o Ausetalia e mafai ona faaaogā e taavale ma tagata ile taimi o lologa ma tafega malolosi. Na faailoa ele minisita ua iai nofoaga ole a fausia ai ia alalaupapa ae sa faailoa atu ele Palemia susuga Tuilaepa L Sailele Malielegaoi e ave se isi alalaupapa faapea i lona itumalo. E foliga na soisoi le tamaitai minisita ona e lē o lavea ai se nuu ole itumalo ole alii Palemia i nofoaga ua faamautu e fausia ai ia alalaupapa mo taimi e faaletonu ai le tau.
Ole afea foi o Samoa ile vaiaso ua mavae ele Minisita ma lana aumalaga sa ia faamautu ai foi ni fesoasoani tupe e miliona tala Ausetalia mo le faalapotopotoga o aiga manuia, le Samoa Family Health Association. E fā tausaga ole a faamatuu mai ai lea miliona Ausetalia ise vaevaega e lima selau afe tala Samoa e maua ile tausaga.
Ose taumafaiga tau faatoaga ua faamatuu i isi le isi miliona tala tupe Ausetalia ma o lea taumafaiga ua unaia ai faifaatoaga laiti e faatau atu fua o a latou faatoaga i faletalimalo i totonu ole atunuu. Ole vaiaso nei ole a faalauiloa ai lenei foi taumafaiga fou tau atinae ise faiga paaga a pisinisi faletalimalo ma le aufaifaatoaga. Ose faiga ole a faalagolago ai faletalimalo i faifaatoaga ile faatau atu o a latou faaeleeeleaga ae faapea foi ile atinae o faiga faiva.
