E ese le manaia o se mafutaga ae nonofo fealofani ma feaeaea‘i le fanau a Keriso. E lē gata o le aufaigaluega faifeau ma faletua, ae tainane le loaloa i tagata lolotu ma ekalesia. Leitioa a fetalai Iesu, “O ou uso outou pe a outou fealofani.”
O le taeao o le Aso Sa na tea nei na faia ai le faatasiga tele lava a le potopotoga o faafeagaiga ma faletua faapea a latou ekalesia lea ua igoa o le Tasi ia Keriso (TIK).
Sa matuai faamanuiaina i taumafaga faaleagaga auā sa malaga mai le taitai aoao o le Ekalesia Worship Centre ma ia folafola se upu faalaeiau auā foi le mamalu o ekalesia e fia sa aofaga potopoto.
O le ‘auga o lenei tuufaatasiga, ina ia tuufaatasi uma ekalesia o se vaega o le Tino o Keriso. O lenei foi ua atofaina le tailua masina ma faia feiloaiga a faifeau ae feiloai uma ai nisi o tagata lotu mai isi ekalesia e aofia ai le AOG, (ACC), Worship Centres, Voice of Christ, Hosanna Baptist ma isi ekalesia ua lē māua.
O le faatasiga muamua lea sa faia i le Aso Sa ua tuanai ae toe faia le isi faatasiga a o lei oo atu i le faaiuga o le tausaga nei.
