Faatulafono ma aiaia faasalaga mo fasiga povi ma faatau

“O suesuega na matou faia na iloa ai ua tele ina faaitiitia le numera o manu papalagi i lafu povi a le au faifaatoaga, ma e eseese mamao numera na matou maua ma numera o faamaumauga i sailiiliga a le ofisa o numera faamaumauina a le Malo”, o le faamatalaga lea a le afioga Leota Laumata le pule sili lagolago o le matagaluega o faatoaga ma faiga faiva o loo vaaia ma pulea le vaega o lafu manu i Avele.

“O le suesuega muamua lava lea na matou faia ma ua faamautu ai nei le matou mau, i le saoasaoa o le fasiina o povi i faalavelave fai faapea le faatau atu”.
O le atinae o lafu manu papalagi o loo ave i ai le faamuamua a le Malo i le atinaeina e pei ona faatau mai povi mai atunuu mamao e pei o Niu Sila ma Ausetalia. E tele tupe e alu ai ae o le taumafaiga a le Malo ia mafai ona faafeusuai povi e faatau mai ona maua ai lea o nisi povi e saga faateleina ai pea manu o lenei atinae, peitai ua faailoa mai e Leota o popolega ua iai nei, o le vave tele o le faaitiitia o manu papalagi i tausaga taitasi ona o le faatau ma fasi i faalavelave.

O le isi itu sili ona ogaoga ua faailoa mai e Leota, o le lē saogalemu o auala o loo faatino i le fasiina o povi ma faaaogā o latou aano mo meataumafa. “O le tasi lena itu ua matou molimauina i le tele o tausaga o tuusaunoa le fasiina o povi ma faatau aemaise o le faaaogā i meataumafa”.

O le masina fou ua fuafua e faitauina ai i le faitauga faatolu ma pasia loa le tulafono fou ua aiaia ai faaletulafono le fasiina o povi ma le saunia oo latou aano mo fefaatauaiga. E lulu le ao o Leota ma faamatala le tulaga o loo iai nei ona e soo se nofoaga lava e fasi ai se povi, ona uta loa lea i se taavale ma ave i se faalavelave pe ave e faatau.
“O nisi na o vaega tāua o le tulafono o le a pasia ona o le a lē toe saofia faiga o loo faia nei. O soo se manu papalagi e fia faatau e manaomia ona faamalieina muamua aiaiga o lea tulafono.

Afai e maua se tagata ua na faatau atu se manu papalagi ae lei pasia le auala na fasi mate ai, o le a molia i le tulafono. O loo aiaia se faasalaga sili ona mamafa i le lē usitaia o lea aiaiga o le falepuipui ma le sala tupe e lē itiiti ifo i le lima afe tala.
“O se auala sili lea ona faamamafa ai i le au fai lafu manu papalagi le tāua o le saogalemu o le saunia o aano o povi mo meataumafa ina ia puipuia ai le soifua maloloina o le atunuu”, na saunoa mai ai Leota. O le tasi o itu ogaoga o loo matauina e le matagaluega o faatoaga i le vaega o lafu manu o loo aliali mai, o le maua o se povi a se tagata mai se faalavelave faapei o se maliu, ona toe ave lea fua ma faatau i se faleoloa o loo faatauina aano o manufasi.

O le povi lava lea e mafai ona toe alu atu le isi tagata toe faatau mai, ma ave i sona faalavelave ma faaaogā ai. “Afai la e lua pe tolu faalavelave lea o le a feaveai ai le povi lava lea e tasi, o lona uiga o le tulaga saogalemu o lona aano mo le faaaogāina i meataumafa ua lamatia ma fesiligia.Le Pule sili lagolago o le Matagaluega o Faatoaga ma Faiga Faiva o loo faauluulu i ai le vaega o lafumanu le afioga Leota Laumata