Ua i Samoa se aufaipese na faatoa feiloai mai lava i lo tatou atunuu i le faaiuga o le vaiaso na tea nei. O le tolu lenei o tausaga o faatautaia lenei faigamalaga – ma o Samoa lava e agai mai i ai, ae e faatoa feiloai lava sui nei mai Ausetalia ma Niu Sila faapea ai Peretania i Samoa, amata a’o ai loa ma pese e faafiafia ai a o iai i le atunuu.
O le aufaipese lenei e faaigoaina o le Singabout e faatoa feiloai mai lava i Samoa ae e fesootai i luga o le initaneti. O sui o aufaipese tetele i totonu o Ausetalia ma Niu Sila ma nisi i Peretania ia ua asiasi mai i lenei tausaga. Faaalia e le alii o loo taitaia lenei aufaipese e faalauiloa lava i soo se tasi e ala i fesootaiga a aufaipese faavaomalo, poo ai e fia tafao i Samoa ma ua mafai ona totogi lona lava pasese e sau e tafao ai, ae maua le avanoa e feiloai ai le isi tagata pese i le isi ma faatuina ai se aufaipese mo se vaiaso pe lua foi ona faafiafia lea i Samoa nei.
E fai faatasi lava la a latou faaaliga poo pesepesega ma se malaga taamilo i motu eseese o Samoa. O ai lava la e tali mai na taua e Tony Backhouse, o se alii faipese lauiloa o Ausetalia ma Niu Sila, e faatoa feiloai lava pe a taunuu mai i Samoa.
O le faamoemoe laualuga o le faasoa atu o o latou tomai faasui aufaipese i tagata o Samoa ae o se avanoa foi ua malaga asiasi mai ai nei tagata, ma tafafao ai i Samoa. Ua tolu tausaga o lenei polokalame ma e eseese lava tagata pepese e asiasi mai i tausaga taitasi ae o nisi ua sosoo lava tausaga o malaga asiasi mai i le faamoemoe e faalautele mai le tomai o le pese ma ia aoina foi nisi o aoaoga taua o loo maua atu i aufaipese i Samoa nei.
E na o Samoa lava e faatino ai lenei taumafaiga ma na taua e Richardson o lona ia manaoga ina ia faaauau lenei faigamalaga asiasi mai i Samoa ona e tele le fesoasoani o loo maua mai i le Pulega o Tagata Tafafao mai i le malaga taamilo ai i Samoa aemaise o le maua ai o le fesootaiga faigofie ma aulotu e afea ma talimalo i nei tagata pepese.
E le gata i lea ae na faaalia e le alii taitai pese, e fiafia lava ia i fatuga faa-Samoa ma e tele ina asiasi na o ia i atumotu e pei o Fiti, Tonga ma isi atumotu o le Pasefika ae o Samoa lea ua ia manatu e talafeagai tonu lava i ai lenei polokalame ma ua mafai ai foi e lenei alii ona aoao atu i aufaipese le tomai o loo moomia i Samoa aua le faaleleia o aufaipese toatele.
O le vaiaso lenei na faafeiloai aloaia ai i latou nei e le Afioga i le Sui Palemia o ia foi o le Minisita o Tagata Tafafao mai ma o loo nonofo lenei aumalaga i Saleapaga i le apitaga tu matafaga o le Faofao. O le fesoasoani a le Pulega o Tagata Tafafao Maimoa mai fafo, e ala atu lea i pau e maua i le tau o faletalimalo ma apitaga tu matafaga e mafai ona nonofo ai nei tagata asiasi mai.
E le gata foi la ina fesootai ia tagata pepese ma aufaipese eseese i totonu o le atunuu, ae o loo maua ma avanoa e asiasi ai i aoga, faapea ai isi potopotoga faalemalo e mafai ona auai mai i ai.
O le Aso Faraile na tea nei na taunuu uma mai ai lenei aumalaga e toa 37. Sa amata ai lava iina ona a’o a latou pese e aofia ai se pese lotu na fofogaina i le sauniga lotu a le EFKS a Saleapaga i le Aso Sa na sei mavae atu nei ae o loo iai le fuafuaga e malaga asiasi solo i vaega eseese o Samoa ma fofogaina ai pese ua mafai ona latou tuufaatasia.
Faaalia e le tamaitai faatonu o lenei aufaipese o Jennifer Richardson e ese foi le manaia o lea faiga, o le faatoa feiloai o lea aufaipese i Samoa ae e vave lava ona tuufaatasia a latou fatuga ma faafiafia loa. O le iai i Samoa e maua ai foi e alii ma tamaitai nei le avanoa ina ia aoaoina ai i nisi o tu ma aganuu faa-Samoa. Ua mafai ona amata aoaoga a lenei aufaipese aemaise i ona tamaitai i le lalagaina o nisi o meataulima ua mafai e tina o Saleapaga ona aoaoina i ai.
Na faafetaia e le Afioga Misa Telefoni le filifilia pea o Samoa e lenei aufaipese e tuufaatasi mai i ai ma faasoa i aufaipese o le atunuu lo latou tomai aemaise o le maua ai foi o le avanoa e asiasi mai ai pea i Samoa o se nofoaga ua faamautu mai i ai lenei polokalame i tausaga taitasi.
