Ua taunuu nei le miti sa valaauina ai e le Atua se tasi o ana auauna ua iu mai le Kolisi Faafaifeau i Malua auā lana galuega le susuga lea i le faifeau Rev Pasefika Maiava ma lona faletua ia Talalelei Maiava.
O le vaiaso na tuanai na aofaga potopoto ai le aufaigaluega a le Atua i le sauniga na faia lava i le malumalu o le EFKS Mascot i le tuatusi numera iva, Shackel Ave, Kingsgrove, Sini.
O le taitai o le sauniga o le Susuga i le Toeaina Rev Elder Taipo Malifa o le Matagaluega Niu Sa Uelese.
O le faitauina o le Tusi Paia sa feagai ma le faifeau o le EFKS Moorebank susuga Rev Tue Lemalu. O le tatalo na saunia e le susuga Rev Fiti Semaia o le EFKS Condell Park ae fetalai mo le Lauga o le aso le faifeau a Prestons EFKS ia Rev Litala Tuimaualuga.
O viiga lava ma pesepesega na saunia e le aufaipese ma le Aoga Aso Sa i le sauniga na faapaiaina ai foi tofi tiakono fou o le susuga ia Farani Swann ma le faletua ia Feao Swann faapea le susuga ia Eric Stowers ma le faletua ia Femateai Stowers.
E to‘aluasefulu matafale poo aiga ua i totonu nei o le Ekalesia fou e aofia ai le Faifeau ia Pasefika ma Talalelei Maiava, Opi ma Taofia Toomalatai, Farani ma Feao Swann ma le aiga, Livigisitone ma Tuinofo Auelua, Eric ma Matea‘i, Tanuvasa Toalepai Teumalo Fouina ma Apo Ofisa, Toalepai Teumalo Fuata ma Katerina Ofisa, Vaele ma Poima Ilalio ma le Aiga, Suafo‘a John Ofisa Mariner, Uluao Tuaoimalii Maiava, Sasagi Ofisa Mariner, Fili Ofisa Mariner, Josh Vaele, Sammy Tuatagaloa, Muaulu Taefu, Mano Semikueva ma Foleni Lynch ma le aiga Mika ma le Aiga, Fenunuti Laau Numiamaalii ma le aiga faapea le aiga o Vagana.
E pei ona silafia o le susuga i le faafeagaiga ia Pasefika Maiava ua loa tausaga o lana auaunaga i le leitio a le Fofoga Moomia sa ia faatuina ae lei agai atu i Malua ma le faletua.
O se tasi o auala o loo aotauina ai le fanau i pesepesega ma viiga o le Atua o le faaaogāina ai o le tomai faatekonolosi i ata ma upu o viiga faasamoa ma faitauga o Tusi Paia i luga o masina vili ata a o faia sauniga ma tapuaiga.
Saunoa le susuga i le Faifeau o se auala lea e auiliili ai le malamalama o fanau o soifua i Ausetalia i faaleoga, sipelaina ma le uiga o upu ma faaolaola ai pea le silafia o la tatou gagana ma mataupu faaleagaga.
Na tuua le sauniga ma see le polokalame i tuamaota mo le taumafataga maoae ma faaaloaloga masani i le Hall a le aulotu ta‘ape ai le aofia na molimauina le faamoemoe.
