Ua tele tausaga o tutu aai pea le Malo e unaia ma siitia le atinae o tagata tafafao poo tulisi e malaga ile atunuu e faaalu ai lo latou tamaoaiga tau tupe. Mai na tausaga ua tuanai ile popo fou ole taumafaiga ole atinae e tele faafitauli oloo fetaiai pea ma le Malo.
Tele faitioga ile le lelei o nisi auaunaga e fesootai ile atinae, ae peitai ose faatupu manatu lea ile Malo e saili ai faiga ma auala silisili e faaleleia ai.
Ole fonotaga a tagata mai auaunaga tau tagata tafafao ole lalolagi sa usuia i Samoa ile uluai vaiaso o lenei masina o Aperila, sa ave ai le faimea silisili ale Pulega o tagata tafafao ile faafiafia o sui mai Europa, Asia, ma le Pasefika ina ia latou faia ni gaioiga e matautia lona lelei e tosoaina mai ai loto o tulisi mai le lalolagi e malaga mai i Samoa.
Na saunoa ai le Minisita o lenei atinae le afioga Sala Fata Lisati Pinati ma ia faailoa nisi o taumafaiga ale Malo e faatosina mai ai tagata tafafao. Ole laina o fesootaiga ua amata faagasolo ona galuega ole isi lea atinae lelei e lagolago ile tulisi.
A lelei fesootaiga televavave faaonapo nei ile atunuu e le fesiligia le fia omai iai o tulisi auā ole isi lea o auaunaga ua faaaoga nei ile lalolagi mo fesootaiga.
O Faletalimalo e le fesiligia ua iai le Sheraton, le Taumeasina Resort, ma isi faletalimalo ua iai nei i Samoa faapea fale apitaga mo tulisi i vaega eseese o motu o Upolu ma Savaii. Peitai ole molimau a nisi tulisi sa fesiligia ua lelei le atinae i Samoa ae oloo fai lava si taugata o potu e faamautu iai.
Ole isi lea luitau ale Malo ia i latou oloo faia faletalimalo ina ia silasila mamao ile tulaga lea aua afai e sili ona taugofie totogi o malaga i vaalele ma faletalimalo e nonofo ai i isi motu ole Pasefika e pei o Fiti, e leai se tulisi ole a fia malaga mai i Samoa.
O isi vaega oloo molimauina e le o lelei ona faafoe ole totogi o matafaga lea oloo tuli tagata ona e fai lava si taugata. Avane ai tulisi ma o tatou lava tagata oloo sili ona faaaogaina ia nofoaga mo tafaoga oloo sili ona mafatia ile totogi.
O tausaga uma e talimalo ai lava le Pulega o tagata tafafao i Samoa i aumalaga mai auaunaga o atinae tau tulisi mai le lalolagi.
Ole autu lava ia malaga mai ia tagata e silasila ile tulaga oloo iai faletalimalo, ma isi vaega mo le atinae ina ia foi atu i fafo io latou atunuu ona maua lea ose ata manino oloo taoto ai le atinae i Samoa e faigofie ai ona latou faia faasalalauga e tala‘i atu ai le atinae ile lalolagi ma faatosina ai tulisi i Samoa.
