Faatonu Tuuu Anasii e faamavae ma le HRPP

O le finagalo lea o le alii Palemia le susuga Tuilaepa Lupesoliai Sailele Malielegaoi na momoli i le sui faipule o le itumalo o se tasi o sui o le Vaega faaupufai e Puipuia Aiā Tatau a Tagata le HRPP, ina ua vevela finauga o le faamanuiaga e maua e le tagata faisaofaga a le NPF pe a maliu.

O le toatele o faipule na teena lenei suiga poo le teuteuga lea ua amata talanoaina i luma o le Palemene ona o le manatu ua umi le suiga lea ua tuu mai e le Malo e mafai ai ona faamanuiaina le faisaofaga i lea vaega o a latou Teugatupe.

O le tasi o faipule na laga le lē talia o lenei suiga o le alii faipule o Faleata i Sisifo ia Lealailepule Rimoni Aiafi, ma na tulai le alii Palemia e faasa‘o atugaluga o Lealailepule i le sui e le malo lea ua tau olioli mai o le tasi le masina e mafai ai ona totogi le saofaga ona maua lea o le faamanuiaga lea. O le suiga ua unai mai o le lua tausaga ona faatoa maua lea o lea faamanuiaga.

Peitai na tulai Tuuu Anasii Leota, le sui faipule o le HRPP mai i le itumalo o Siumu ma ia fesiligia ai le alii Palemia a o faia le faamalamalamaga a le taitai o le Malo.

Faapea mai Tuuu pe na fai se suesuega a le NPF ma iloa ai le aofai o ni tagata ua maliliu i totonu o le masina e tasi auā e foliga mai ua popole le NPF poo le Malo foi nei toatele e maliliu i totonu o le umi lea, fua i le manaoga e agai i le lua tausaga ona faatoa mafai lea ona maua lea faamanuiaga.

O le tali a le alii Palemia e faavalevalea tele lea fesili ua fai, ma o le alii faipule lenei ua leva lava ona leai ma le HRPP ma ua tatau nei ona faamavae.

Toe lau foi e Tuuu Anasii le faavalevalea o faamatalaga a le alii Palemia, ae tali ane Tuilaepa e lē mafai e Tuuu ona toe faasa‘o lana ia foi faasa‘o o loo fai agai ia Lealailepule, e lē o faiga ia poo faavae o felafolafoaiga a le Palemene, ma na ia faapea mai ua leva ona faipule o le Palemene Tuuu ae o lea lava e lē toe malamalama i aluga o felafolafoaiga i totonu o le maota.

O lea na maua faamatalaga o le afiafi ananafi lea na talo ai se fono faatopetope a le faafaletui a le HRPP se‘i saili pe faamavae le tofi pe faatea foi ae e oo mai i le taimi o le tatou pepa e lei iai se faaiuga ua mafai ona maua i lea fono faatopetope.
Le alii faipule, Afioga Tuuu Anasii LeotaLe alii faipule, Afioga Tuuu Anasii Leota