“A le usitaia le faaiuga a le faamasinoga e ono masina ile falepuipui”… Faamasino
E amata atu i le masina o Oketopa o le tausaga nei ona totogi auauai e matai o le afioaga o Tanugamanono na faatutu i ai le tagi a le aiga o Faumuina Tutuila mo se taui taui tupe o a latou meatotino na faaleagaina ma faatama‘ia ona faatino le totogiina o le $868,000. O le aofaiga lea o le taui tupe mo fale, taavale ma isi meatotino uma poo aseta a le aiga na aafia.
E fitu afe i le masina e amata totogi atu e matai o loo aafia i le aiga, seia oo ia Iuni o le tausaga fou 2015 ona siitia lea o le totogi i le $12,000 i le masina. O Iuni o le tausaga e 2016 e siitia ai i le $13,000 i le masina, tausaga e 2017 i le masina lava o Iuni e siitia ai le totogi i le $14,000 ma faaauau ai seia oo i le masina o Oketopa o le tausaga e 2018 ua alu i luga le seleni e totogi i le masina i le $24,000 ma faaauau ai seia oo ina mae‘a.
O le valu pasene sa poloaina e le faamasinog e faaopoopo i luga o le aofaiga atoa o le seleni mai le taimi e amata ai ona totogi le taui ua aveesea. O lona uiga e na o le $868,000 afe lava le taui tupe o le a totogi e aunoa ma se tului faaopoopo. Na faaalia e le tina o Afu Faumuina Tutuila o se alo tamaitai e faasino i le afioga Faumuina Tutuila, o lea faatoa mautu lelei le taotoga o le mataupu, auā e ui ina ua mae‘a faamasinoga sa finau ai ma aumai le faaiuga ua manumalo le latou talosaga mo se taui tupe, ae sa faatali pea pe o le ā le taimi e faatino ai.
E mafua lea itu ona na saunoa le tina, ua tele mea sa faaleagaina i le faalavelave ma ua toe fia faaleleia fale ma isi meatotino na aafia. O le faaiuga ua taoto mai ai le talosaga a matai Tanugamanono i se faiga e totogi ai le vaegatupe tele, o le mutaaga lea o le mataupu ma o le sitepu ua sosoo ai nei, o le totogi loa o le taui. Peitai ua faailoa e le afioga i le faamasino o Lesatele Rapi Vaai i lana faaiuga na fofogaina i le Aso Faraile 15 o Aukuso 2014, o le lē usitaia e matai o le iuga ua iai, o le a tuuina atu ai i le falepuipui i latou mo le umi e ono masina. O matai o loo aafia i le mataupu ua maliu se tasi o i latou e toasefulufitu ua ta‘ua i lalo le afioga lea Anauli Pofitu Fesili.
O matai Tanugamanono: Tuuamaalii Peni Punitia, Tupuola Afa Lesa, Anauli Pofitu Fesili, Fetaoai Vau Samau, Upuese Tanielu Lepou, Sinava Lima, Palaialii Louis Tafunai, Palaialii Tuvale Atoa, Palaialii Ionatana Pula, Palaialii Gene Taatasi, Palaialii Pauesi Teo, Asotasi Vaa Falealili, Tia Elise Solo, Galuvaa Sagauga Metuli, Atoa Kisona, Tuua Fasi Leota, Tuuamaalii Siataga Mann.
