Ua faanoanoa tele le kalapu Lakapi Liki a le Roosters i le uigi iloga ia Roger Tuivasa Sheck talu ai lona sainia o se konekarate ma le Warriors mo le tolu tausaga e tusa ma $2.4 miliona.
Saunoa se tasi o pulega a le Roosters ia Peter O’Sullivan o le faanoanoaga o le Roosters ona sa o latou atinaeina mai lava Roger mai le sefuluvalu o ona tausaga mai Niu Sila ma koleni faapea le faafaigaluegaina ma faamautu lona aiga iinei ae o lenei ua tuua le kalapu.
O le alii o Roger mai Vaimoso sa tapena e le Roosters e suitulaga ia Anthony Minichello lea ua uma lava lona soifua taalo o faamaoni i le Roosters ma o se tagata iloga o le lakapi liki i le lalolagi.
Sa ripotia mai foi e le Roosters le tele o le taimi na fesoasoani ai Minichello ia Tuivasa i le tulaga lava o le fulupeki ma lona silafia lautele i le taaloga.
E oo lava foi i le taumafa (diet) na suia uma auā le taumafaiga a le Roosters ia ausia e Sheck le tulaga maualuga o lana taalo. E ui i lea ua masaa le ipuvai ma ua maualuga atu le ofo a le Warriors mo lenei alo o le atunuu.
Na saunoa foi se tasi o Roosters iloga muamua ia Brad Fittler, ‘Ua matua faateia lava le kalapu i le faaiuga a Roger Tuivasa Sheck ae o le mea sili lava na faia uma nei feutagaiga ma le mamā ae lē o faaalatua le feagaiga ma le Warriors. O le a misia e le Roosters Tuivasa.’
O le 2013 i le Ipu o le Lalolagi na faia i Egelani na filifilia ai e le Toa Samoa Roger Tuivasa Sheck i lana aufili faapea foi Niu Sila.
E umi le taufaoga o Tuivasa e Niu Sila ma Samoa i lea tausaga ma na iu lava i le filifilia e Roger Tuivasa Sheck le Kiwi.
