Faatofa mai ile Malo le Hai-Komesina o Peretania mo Samoa

 Ole Hai-Komesina o Peretania mo Samoa le susuga Jonathan Sinclair ma le Konesula o Peretania i Samoa le afioga Taulapapa Brenda Heather Latu
Ole Hai-Komesina o Peretania mo Samoa le susuga Jonathan Sinclair ma le Konesula o Peretania i Samoa le afioga Taulapapa Brenda Heather Latu

“E le faagaloina ia te au ma lo’u aiga le tausaafia o tagata Samoa”…Jonathan Sinclair

Ole tolu tausaga ole Hai-Komesina ole Malo o Peretania mo Samoa ae faamautu i Ueligitone i Niu Sila ole a mae’a ile faaiuga o lenei tausaga. Ole vaiaso ua mavae na malaga atu ai i Samoa le Hai-Komesina le susuga Jonathan Sinclair e faamavae i ta’ita’i ole Malo o Samoa faapea paaga ale Malo o Peretania.

Ole afioga ile Ao Mamalu ole Malo na muamua afea ele Hai-Komesina lea sa folasia ai e Jonathan lona loto faafetai ile Ao ole Malo ona ole lagolago a Samoa ile tele o atinae a lona Malo ua faatino ile tolu tausaga o lana nofoaiga ole a mae’a.

O se tasi o polokalame fesoasoani a Peretania sa faatino ele alii Hai-Komesina ole polokalame mo le atinae ole tamaoaiga e tuusa’o i taumafaiga tau pisinisi laiti lea oloo faafoe ele faalapotopotoga o pisinisi laiti i Samoa poo le SBEC (Small Business Enterprises). Ole masina ua mavae sa malaga atu ai le Faatonu ole SBEC ma sui ole Faalapotopotoga a tina faipisinisi o Samoa ise faatasiga tele sa faia i Niu Sila sa maua ai lo latou silafia i auala uma e mafai ai ona faatino le fesoasoani a Peretania mo le atinae o pisinisi laiti i Samoa.

Faaalia e Jonathan ole faitotoa o lea fesoasoani a lona Malo e mafai ai e tagata Samoa ona faatutu ni taumafaiga tau pisinisi e mafai ona manuia ai ma isi tagata i totonu ose faalapotopotoga poo totonu foi o nuu ma afioaga. Ole Konesula o Peretania i Samoa le afioga Taulapapa Brenda Heather Latu oloo lotolotoi ile faatinoina o fesoasoani nei ma o lana faamatalaga ina ua faia se faatalanoaga ile ofisa o Peretania i Samoa, e mafai e soo tagata ona agavaa ile fesoasoani ae ole itu sili ona tāua ole faataotoina ole fuafuaga ose pisinisi poo se business proposal ina ia fetaui tonu ma taiala e agavaa ai i seleni maua mai lea fesoasoani.

E tele isi polokalame fesoasoani a Peretania mo Samoa ae ole tele o ia fesoasoani e faaauala mai i faiga paaga ma le Iuni a Europa poo le European Union. Peitai ole a faaauau pea ia fesoasoani pe a oo ina le toe avea Peretania ma sui ole Iuni a Europa ile tausaga e 2019.

Ose tasi o fesoasoani tāua a lenei Malo oloo auala mai ile polokalame o suiga ole tau lea oloo maua ai e atunuu laiti ole Pasefika e pei o Samoa fesoasoani tau tupe mo le faia o polokalame e faafetaui atu ai i suiga ole tau lea e fesootai ma taumafaiga tau pisinisi, o faatoaga, faapea gaioiga uma mo le puipuia malu ole siosiomaga.

Ole faaiuga ole vaiaso ua mavae na talimalo ai le Hai-Komesina ise fiafia e faapine ai lana faatofa mai ile Malo o Samoa ma ona tagata ao lei tuua le tofiga ile masina o Tesema ole tausaga nei.